Գերմանիայում ոստիկանությունը ձերբակալել է Տրիր քաղաքի բնակչի, որը գողացել է 500 արձաններից մեկը, որոնք պատկերում են Կարլ Մարքսին՝ հաղորդում է Die Welt-ը: Պարբերականի տվյալներով՝ հարբած տղամարդը, որը փիլիսոփայի արձանը տարել է ուսին դրած, ձերբակալվել է մայիսի 6-ին:
Ինչպես նշում է պարբերականը, արձանը գողացել է 24-ամյա մի երիտասարդ, որի անունը չի հաղորդվում: Ոստիկանների հետ զրույցի ժամանակ նա նշել է, որ «պլաստիկե Մարքսին վերցրել է», որպեսզի դրանով զարդարի իր տան հյուրասենյակը: Չի նշվում, թե երիտասարդի հանդեպ ինչ պատժամիջոցներ են կիրառվելու:
Գողացված արձանն արժե մոտ 300 եվրո, այն կրկին իր տեղում է:
Կարլ Մարքսին պատկերած քանդակը գեղարվեստական նախագծի մի մասն է՝ նվիրված «Կապիտալ»-ի հեղինակի ծննդյան 195-ամյակին:
Ակցիայի նախաձեռնողը նկարիչ Օթմար Հերլն է, որը Տրիրում՝ փիլիսոփայի հայրենի քաղաքում, տեղադրել է Մարքսի 500 արձան՝ կարմիրի տարբեր երանգներով:
