Եվրամիությանը մնացել է «6-8 շաբաթ»՝ Շենգենյան համակարգը փրկելու համար: The Financial Times-ի փոխանցմամբ՝ Դավոսում համաշխարհային տնտեսական ֆորումի ժամանակ այս մասին հայտարարել է Նիդերլանդների վարչապետ Մարկ Ռյութեն:
«Գարնան գալու հետ մեկտեղ կաճի ներգաղթյալների հոսքը, որը կարող է առաջացնել համակարգի անշտկելի կործանում, քանի որ Շենգենյան համաձայնագրի անդամ-երկրները կձգտեն վերականգնել սահմանների վերահսկողությունը: Մենք այլևս չենք կարող հաղթահարել նման քանակությունը»,- հայտարարել է նա:
Բացի այդ, քաղաքական գործիչը խոստովանել է, որ Շենգենյան համակարգի որոշ քայքայում արդեն նկատվում է՝ հատկապես հաշվի առնելով վերջերս Շվեդիայի և Դանիայի միջև սահմաններին ստուգումների վերականգնումը՝ ի պատասխան փախստականների մեծացող հոսքի:
Այդ դիրքորոշումը պաշտպանել է Գերմանիայի ֆինանսների նախարար Վոլֆգանգ Շոյբլեն, ով հայտարարել է, որ «նույնիսկ չի ցանկանում մտածել այն հարցի շուրջ», թե արդյոք Գերմանիան 2016-ին կհաղթահարի՞ փախստականների ևս մեկ միլիոն՝ 2015-ին ժամանած մեկ միլիոնից հետո:
