Կինոարվեստի ամերիկյան ակադեմիան կանցկացնի զգալի փոփոխություններ՝ կապված «Օսկար»-ի մրցանակի համար անվանակարգերի շուրջ ծագած սկանդալի հետ: Ոլորտի շատ հայտնի ներկայացուցիչների դժգոհության պատճառն այն է, որ դերասանական անվանակարգերում 20 հավակնորդների շրջանում այս տարի չկա ոչ մի աֆրոամերիկացի: Համապատասխան հայտարարությամբ հանդես է եկել ամերիկյան կինոակադեմիկոսների նախագահ Շերիլ Բուն Այզեքսը՝ գրում է TASS-ը:
«Դա բարդ, սակայն կարևոր խոսակցություն է, և եկել է մեծ փոփոխությունների ժամանակը: Ակադեմիան արմատական քայլեր կձեռնարկի իր անդամների կազմի փոփոխության համար»,- հայտարարել է Այզեքսը:
«Առաջիկա օրերին կամ շաբաթներին մենք կգնահատենք անդամության համակարգը, որպեսզի 2016-ին և հաջորդ տարիներին մեր կազմում մտցնենք այնքան անհրաժեշտ բազմազանությունը»,- հավելել է նա:
