ՀՀ ԱԺ փոխնախագահ, Հայաստան-Էստոնիա պատգամավորական բարեկամության խմբի ղեկավար Էդուարդ Շարմազանովը հունվարի 11-ին Տալինում հանդիպում է ունեցել Էստոնիայի Հանրապետության Ռիիգիկոգուի առաջին փոխնախագահ Հելիր-Վալդոր Սիդերի հետ:
Էդուարդ Շարմազանովի գրասենյակից հայտնում են, որ հանդիպմանը երկուստեք կարևորվել է երկու երկրների խորհրդարանների միջև համագործակցության զարգացումը:
Էդուարդ Շարմազանովն իր երախտագիտությունն է հայտնել էստոնական կողմին Տալինում Հայոց ցեղասպանության 100-րդ տարելիցին նվիրված ցուցահանդեսի անցկացման հարցում ցուցաբերած աջակցության համար: ԱԺ փոխնախագահը նշել է, որ անցյալ տարի Տալինի Սուրբ Յանի եկեղեցում Հայոց ցեղասպանության 100-ամյակին նվիրված «Քեզ հետ, Հայաստան» համերգին իր հրավերով ներկա են եղել նաև Էստոնիայի խորհրդարանի նախկին փոխնախագահ Լայնե Ռանդյարվը և բնապահպանության նախկին նախարար Մատի Ռայդման:
Անդրադառնալով Հայաստան-Եվրամիություն համագործակցությանը՝ Էդուարդ Շարմազանովը նշել է, որ Հայաստանը կարևորում է ԵՄ-ի հետ քաղաքական երկխոսության շարունակականությունը:
Զրուցակիցներն անդրադարձել են Հարավային Կովկասում տիրող աշխարհաքաղաքական իրավիճակին: ԱԺ փոխնախագահը, անդրադառնալով ԼՂ հակամարտությանը, ընդգծել է, որ ՀՀ-ն և ԼՂՀ-ն հիմնախնդրի բացառապես խաղաղ կարգավորման կողմնակից են` երեք հայտնի սկզբունքների հիման վրա: Նա նշել է, որ խնդրի ռազմական լուծման ցանկացած փորձ դատապարտելի է և անթույլատրելի:
Էդուարդ Շարմազանովը Հելիր-Վալդոր Սիդերին հրավիրել է 2016 թվականին պաշտոնական այց կատարել Հայաստան:
