Նալբանդյանի այցը ԼՂ մեկ խորհուրդ ունի՝ իշխանությունները հաշվի են նստում Ղարաբաղի հետ: Այս մասին այսօր «Առաջին լրատվական»-ի հետ զրույցում ասաց ԼՂ ԱԳ նախկին նախարար Արման Մելիքյանն՝ անդրադառնալով ՌԴ-ում ՀՀ և ՌԴ ԱԳ նախարարների հանդիպմանը և դրան հաջորդած՝ Էդուարդ Նալբանդյանի այցին Ղարաբաղ:
Արման Մելիքյանն ասաց, որ անկախ Հայաստանի արտաքին քաղաքականության հանդեպ ունեցած իր բոլոր վերապահումներից՝ չի կարող ընդունելի համարել պարոն «Նալբանդյանին Մոսկվայից գործուղեցին Ղարաբաղ» ձևակերպումը: Ըստ նրա՝ ՀՀ արտգործնախարարի այցն Արցախ միայն մեկ խորհուրդ կարող է ունենալ` Հայաստանն Արցախը դիտարկում է որպես առանձին և ինքնուրույն խաղացող, որի կարծիքի հետ ՀՀ իշխանությունները հաշվի են նստում, ու որին նաև իրազեկում են իրենց ունեցած տարաբնույթ շփումների ընթացքի և արդյունքների մասին: ԼՂ ԱԳ նախկին նախարարն ավելի քան վստահ է, որ Ռուսաստանն Արցախի իշխանություններին իր դիրքորոշումը հայտնելու համար այլ սուրհանդակների ծառայություններից օգտվելու անսահմանափակ հնարավորություններ ունի:
«Կարծում եմ, որ այս կարգի հանդիպումների կարիքը գործնականում հենց հայկական կողմերն ունեն, և ես դա օրինաչափ եմ համարում ստեղծված իրավիճակում: Միաժամանակ գտնում եմ, որ Ռուսաստանի իրական ազդեցությունը հակամարտության կարգավորման ընթացքի վրա կայուն է եղել այս տարիների ընթացքում` պարոն Մեդվեդևի նախաձեռնություններն իր նախագահության ժամանակաշրջանում իրականում Ռուսաստանի` հակամարտության կողմերի հանդեպ ունեցած քաղաքական ազդեցության առարկայական աճի վկայությունը չեն եղել երբեք: Կարծում եմ նաև, որ բոլորիս համար ոչ ցանկալի ռազմական գործողությունների վերսկսման պարագայում Ռուսաստանը բավարար ռազմատնտեսական ներուժ ունի միջամտելու համար, և այդօրինակ միջամտությունն էլ կբխի իր անմիջական շահերից»,- ասաց Արման Մելիքյանը:
Հիշեցնենք, որ ՀՀ ԱԳ նախարար Էդուարդ Նալբանդյանն օրեր առաջ պաշտոնական այցով մեկնել էր ՌԴ, որտեղ Ռուսաստանի արտգործնախարար Սերգեյ Լավրովը Նալբանդյանի հետ մամլո ասուլիսի ընթացքում հայտարարել էր, որ Մոսկվան առաջընթաց չի տեսնում Լեռնային Ղարաբաղի հակամարտության կարգավորման գործընթացում: Անմիջապես մոսկովյան այցից հետո Նալբանդյանը ժամանել է Ղարաբաղ:
