Human Rights Watch միջազգային իրավապաշտպան կազմակերպությունը գտնում է, որ Հայաստանի իշխանությունները պետք է ազատ արձակեն քաղաքական ակտիվիստ Գևորգ Սաֆարյանին, ում ձերբակալել են հունվարի 1-ին հավաքի ընթացքում:
Ըստ կազմակերպության՝ իշխանությունները նաև պետք է վերանայեն հավաքի ընթացքում ոստիկանության վարքագիծը և հնարավոր ոստիկանական միջամտությունը մտքի, խոսքի և հավաքների ազատությանը:
«Հաշվի առնելով միջադեպի չնչին բնույթը՝ երկու ամիս նախնական կալանքն արդարացված չէ»,- ասել է Human Rights Watch-ի Հարավային Կովկասի ներկայացուցիչ Գեորգի Գոգիան «Նախնական կալանքը պետք է լինի վերջին տարբերակը, ոչ՝ համատարած, և միայն այն դեպքերում, երբ հիմնավոր մտավախություն է առկա, որ անձը կարող է խուսափել արդարադատությունից կամ խոչընդոտել քննությանը»:
Human Rights Watch-ը համարում է, որ Սաֆարյանին երկու ամսով կալանքի տակ պահելը լիովին անհամաչափ է՝ հաշվի առնելով ապացույցների բացակայությունը, որը կվկայեր, որ նա իրական վտանգ է սպառնում հետաքննությանը: «Առանց որևէ հիմնավոր պատճառի Սաֆարյանին ճաղերի հետևում պահելով, դժվար չէ եզրակացնել, որ իշխանությունները թիրախավորում և ազատազրկում են նրան իր քաղաքական խաղաղ ակտիվիզմին միջամտելու համար»,- ասել է Գոգիան:
Հունվարի 5-ին Human Rights Watch-ը նամակ էր հղել Հայաստանի գլխավոր դատախազին, որում իր մտահոգությունն է հայտնել Գ. Սաֆարյանին առաջադրված մեղադրանքների և նախնական կալանքի վերաբերյալ և կոչ է արել նրան ազատ արձակել՝ սպասելով քննությանը:
Հիշեցնենք, որ Գևորգ Սաֆարյանը ձերբակալվել է Ամանորի գիշերը՝ ոստիկանի նկատմամբ բռնություն կիրառելու կասկածանքով: Իսկ հունվարի 3-ին դատարանը նրա նկատմամբ որպես խափանման միջոց կիրառեց կալանքը:
