Պարզվում է, ալկոհոլ պարունակող խմիչքները մարդու առողջության վրա ոչ միայն բացասական ազդեցություն են թողնում: Բրիտանիայի ուսումնասիրողներն այս պրոցեսում որոշ դրական կողմեր են հայտնաբերել, որոնցից գլխավորն այն է, որ ալկոհոլային խմիչքների պարբերաբար օգտագործումը նվազեցնում է ռևմատիկ արտրիտի զարգացման սպառնալիքները: Գիտնականները ենթադրում են, որ ալկոհոլի ոչ մեծ չափաքանակը նվազեցնում է լարվածությունը, ինչպես նաև մեղմ ցավազրկող միջոց է հանդիսանում:
Ռևմատիկ արտրիտն ի հայտ է գալիս այն ժամանակ, երբ մարմնի դիմադրողական համակարգը չափազանց ակտիվ է գործում և վնասում է հոդերն ու մարմնի այլ մասերը: Ընդ որում, թեթև վարակն էլ բավական է, որպեսզի չափազանց մեծ ռեակցիա առաջանա: Արդյունքում հոդերը բորբոքվում և ուռչում են: Մկների վրա արված փորձերը ցույց են տվել, որ դրանք ավելի քիչ են տառապում արտրիտից, երբ դրանց խմելու ջրի մեջ պարբերաբար փոքր քանակությամբ ալկոհոլ են ավելացնում: Նույնը կատարվում է նաև մարդկանց հետ:
Ուսումնասիրելով 12 000 հիվանդների՝ գիտնականները պարզել են, որ պարբերաբար ալկոհոլ օգտագործողների ռևմատիկ արտրիտով հիվանդանալու հավանականությունը 48 տոկոսով ցածր է:
