Ադրբեջանական 1News.az կայքը, վկայակոչելով կիպրական Fileleftheros թերթին, նշում է, որ Կիպրոսի Հանրապետության կառավարությունը մտադիր է արգելք հանդիսանալ Ադրբեջանի ու Հյուսիսային Կիպրոսի միջև ավիաթռիչքներին:
Պլանավորված է, որ այդ թռիչքները մեկնարկելու են հունիսի 21-ին: Կիպրոսի Հանրապետության նախագահ Դիմիտրիս Խրիստոֆիասն այդ կապակցությամբ բանակցություններ է վարել Քաղաքացիական ավիացիայի միջազգային կազմակերպության (ICAO) գլխավոր քարտուղար Ռոնալդ Բենջամինի, ինչպես նաև Թռիչքների անվտանգության համաշխարհային հիմնադրամի ու Եվրավերահսկման ներկայացուցիչների հետ:
Խրիստոֆիասը քննադատել է Թուրքիային` ավիաչվերթների հետ կապված միջազգային համաձայնագրերը խախտելու համար: Դա պայմանավորված է նրանով, որ աշխարհի ցանկացած վայրից ինքնահռչակ Հյուսիսային Կիպրոս կարելի է ընկնել դրա անկախությունը ճանաչած միակ երկրից` Թուրքիայից (Լեռնային Ղարաբաղի պատճառով Ադրբեջանը զրկված է այդ գայթակղությունից):
Հիշեցնենք, որ արաբական աշխարհի վերջին զարգացումներից հետո Անթալիան ու Հյուսիսային Կիպրոսը պայքարելու են զբոսաշրջիկներին հրապուրելու շուրջ: Դա վերաբերում է նաև Ադրբեջանին:
Նշվում է, որ Հյուսիսային Կիպրոսում հանգիստն առավել էժան կլինի:
Բացի այդ, Հյուսիսային Կիպրոսում գործում են խաղատներ, ինչի պատճառով էլ զբոսաշրջիկների 15-20 տոկոսը նախընտրում է հանգստանալ հենց Հյուսիսային Կիպրոսում:
Ադրբեջանցի զբոսաշրջիկների համար Հյուսիսային Կիպրոսի զբոսաշրջային փաթեթը կարժենա ընդամենը 400 մանաթ (500 դոլար), իսկ Անթալիայի փաթեթը` մոտ 600 մանաթ (750 դոլար):
