Սիրիայի գործող նախագահ Բաշար Ասադին չի կարելի զրկել 2017-ին նշանակված պետության ղեկավարի ընտրություններին մասնակցելու հնարավորությունից։ Մասնակցության դեպքում նա կպահպանի իր պաշտոնը՝ հայտարարել է Ռուսաստանի նախագահ Վլադիմիր Պուտինը Մոսկվայում ԱՄՆ պետքարտուղար Ջոն Քերիի հետ ունեցած դեկտեմբերյան բանակցություններում։ Այս մասին հայտնում է Bloomberg-ը՝ հղում անլով իրավիճակին ծանոթ մի քանի աղբյուրների։
Գործակալության տվյալներով՝ ամերիկյան դիվանագիտության ղեկավարը չի համաձայնել Ռուսաստանի նախագահի պահանջին՝ նշելով, որ նման պայմանը հակասում է Ասադի ճակատագրի վերաբերյալ Վաշինգտոնի դիրքորոշմանը։
Bloomberg-ը նշում է, որ Պուտինը կոնսենսուսի է եկել Քերիի հետ Սիրիային վերաբերող երկու այլ հարցերում։ Ռուսաստանի նախագահը հավանություն է տվել սիրիական սփյուռքի կողմից քվեարկությանը մասնակցելու ԱՄՆ առաջարկին, ինչպես նաև համաձայնել Պարսից ծոցի երկրների ու Թուրքիայի կողմից աջակցվող զինված ընդդիմադիր խմբավորումների՝ քաղաքական գործընթացին միանալուն։ Ինչպես հստակեցնում է գործակալությունը, դրանք են «Ջեյշ Ալ-Իսլամն» ու «Ահրար Ալ-Շամը»։ Կրեմլի պայմանով՝ այդ կազմավորումները պետք է դադարեցնեն իրենց մասնակցությունը մարտական գործողություններին։