«Հրապարակ»-ը մեջբերել է Նունե Ավետիսյանի ֆեյսբուքյան ուշագրավ գրառումը. «Գնացել էի Կոմիտասի պանթեոն… Ուշ ժամ էր շատ… Լուսանկարվում էի հայ հանճարների շիրմաքարերի մոտ, իմ համեստ խոնարհումը բերելով մեր ՄԵԾԵՐԻՆ… Հանկարծ, չգիտե՞ս որտեղից, մի երիտասարդ հայտնվեց… – Տիկին, Դուք չեք կարող լուսանկարվել ա՛յս շիրմաքարի կողքին։ Նայեցի, բոլորից առանձնացած, վեր էր խոյանում մի շքեղ, միլիոնանոց գերեզմանաքար։ Մութ էր։ Մոտեցա, որ տեսնեմ, թե էդ ո՞ւմ գերեզմանն է՝ իր շքեղությամբ այդքան տարբեր մեր հանճարների համեստ գերեզմաններից… Կարդացի… Անդրանիկ Մարգարյան… Կարդացի ու հասկացա, որ այդ երիտասարդը հսկում էր նրա շիրմաքարը… Բայց չհասկացա, թե ինչո՞ւ, ումի՞ց։
Գիշեր-ցերեկ հսկում էր խեղճը երևի մի շիրմաքար, որ պարզապես ճիշտ տեղում չէր ու թերևս պաշտպանվելու կարիք ուներ հենց միայն այն պարզ պատճառով, որ ժողովրդի կամքով չէր հայտնվել հայոց հանճարների կողքին։ Մի՞թե մեր վերջին մասունքներն էլ են այսպես խլելու մեր ձեռքից։ Մի՞թե սեփականաշնորհելու են մեր ամենասուրբ անկյունն ա՛յս, որ անքննելի սրբություն է հայի համար։ Ու հնչեց պատասխան խոսքն այդ խեղճուկրակ երիտասարդին։ – Տղա ջան, մենք ՊԱՆԹԵՈՆ ենք եկել»:
