Վրաստանի վարչապետ Բիձինա Իվանիշվիլին հայտարարել է, որ 2008թ. իրականացվել է Վրաստանի բնակչության էթնիկ զտում: Ինչպես հաղորդում է «Գրուզիա Օնլայն»-ը, այս մասին նա հայտարարել է ՆԱՏՕ-ի խորհրդարանական ասամբլեայի Rose-Roth 83-րդ սեմինարի շրջանակներում:
Նա նշել է, որ 2008թ. շրջափակվել է Վրաստանի տարածքի 20%-ը, իրականացվել է էթնիկ զտում: «Դա հաստատված է միջազգային հանրության կողմից և նկարագրված է շատ փաստաթղթերում: Մեր երկիրն ունի բազմաթիվ փախստականներ, և մենք անում ենք ամեն ինչ այդ խնդիրը լուծելու համար»,- ասել է վարչապետը:
Իվանիշվիլին նաև հայտարարություն է արել ի պատասխան մտավախության, որ ռուս-վրացական երկխոսությունը համանախագահների մակարդակով կարող է կողմերին հեռացնել Ժնևի ձևաչափից: «Ռուսաստանի հետ հարաբերությունների հարցերով հատուկ ներկայացուցիչ նշանակելը թույլ է տվել մեզ առաջընթացի հասնել որոշակի ուղղություններով: Ի նկատի ունեմ տնտեսական հարաբերությունները, սակայն կարծում եմ, որ Ժնևը միակ ձևաչափն է՝ Ռուսաստանի հետ երկխոսելու համար»,- ասել է Իվանիշվիլին:
Վրաստանի վարչապետը նշել է, որ «նոր կառավարության ցանկացած քայլ՝ ուղղված Ռուսաստանի հետ հարաբերությունների բարելավմանը, առաջացնում է ընդդիմության ագրեսիան»: Դրա հետ մեկտեղ նա հիմնվել է ռուսական կողմի հայտարարության վրա, որ իրենք ցանկացել են վերականգնել առևտրային հարաբերությունները Վրաստանի նախկին իշխանությունների հետ, սակայն վրացական կողմը արգելափակել է այդ առաջարկները:
