Վրաստանի անդամակցությանը ՆԱՏՕ-ին խոչընդոտում է անջատողական շրջանների գոյությունը: Ինչպես հաղորդում է Trend գործակալությունը, նման հայտարարությամբ հանդես է եկել Վրաստանի վարչապետ Բիձինա Իվանիշվիլին Rose Roth 83-րդ սեմինարի բացումից առաջ, որն անցկացվում է ՆԱՏՕ-ի Խորհրդարանական ասամբլեայի աջակցությամբ:
«Այս սեմինարը Վրաստանում անցկացվում է արդեն չորրորդ անգամ: Վրաստանն այս ուղղությամբ շատ բան է արել: Մենք լիովին պատրաստ ենք անդամակցել ՆԱՏՕ-ին՝ չնայած որոշակի գործընթացներ խոչընդտում են դրան: Կարծում եմ՝ շնորհիվ մեր ակտիվության մենք կկարողանանք հաղթահարել նաև այդ խոչընդոտը՝ դառնալով դաշինքի անդամ»,- ասել է Իվանիշվիլին:
Երկուշաբթի Վրաստանի մայրաքաղաք Թբիլիսիում ՆԱՏՕ-ի Խորհրդարանական ասամբլեայի աջակցությամբ իր աշխատանքն է սկսել Rose Roth 83-րդ սեմինարը՝ «Հարավային Կովկաս. աշխարհաքաղաքականություն, եվրատլանտյան ինտեգրում և ներքին մարտահրավերներ» թեմայով:
Սեմինարի ընթացքում կքննարկվեն ռուս-վրացական հարաբերությունները, հարավկովկասյան երկրների ինտեգրումը եվրատլանտյան կառույցներին, Վրաստանում նախատեսված բարեփոխումների ծրագրերը, տարածաշրջանային հարցեր:
Սեմինարն իր աշխատանքը կավարտի մայիսի 1-ին:
