Դեմոկրատական կուսակցությունից ԱՄՆ նախագահի թեկնածության հավակնորդ Հիլարի Քլինթոնը կտրուկ քննադատել է Հանրապետական կուսակցությունից իր պոտենցիալ մրցակից, միլիարդատեր Դոնալդ Թրամփին։ Այս մասին փոխանցում է BBC-ն։
«Նա ինձ համար այլևս ծիծաղելի չէ»,- հայտարարել է Քլինթոնը գործարարի հասցեին, ում նախընտրական արշավը լեցուն է արտասովոր հայտարարություններով։
Քլինթոնը վտանգավոր է համարել Թրամփի՝ օրերս արած առաջարկը՝ մուսուլմանների համար ԱՄՆ մուտքի թույլտվությունները դադարեցնելու մասին։
Կալիֆոռնիական Սան Բերնարդինո քաղաքում 14 մարդու սպանությունից հետո Թրամփի արած սկանդալային հայտարարությունը վրդովմունք է առաջացրել ողջ աշխարհում։
«Այս անգամ նա հատեց գիծը։ Այն, ինչ նա ասում է, ոչ միայն ամոթալի է և սխալ, այլև վտանգավոր»,- ասել է Քլինթոնը։
Նրա խոսքով՝ նման հայտարարություններով Թրամփը արմատական իսլամիստներին տալիս է քարոզչության լավ գործիք և Եվրոպայից ու ԱՄՆ-ից ավելի շատ կողմնակիցների հավաքագրման հնարավորություն։
Հարցումների համաձայն՝ Թրամփի առաջարկին աջակցում է հարցվածների 25 տոկոսը։
