Անկարան հրաժարվում է Դամասկոսի իշխանություններին վերադարձնել Թուրքիայի հետ սահմանին մաքսանենգներից բռնագրավված սիրիական արվեստի գործերն ու արժեքները: Reuters-ի հաղորդմամբ՝ այս մասին հայտնել է Սիրիայի Հնությունների և թանգարանների գլխավոր վարչության ղեկավար Մամուն Աբդուլքարիմը:
«Թուրքական կառավարությունը հրաժարվում է գրանցել (բռնագրավված օբյեկտները): Ոչ մի տեղեկություն, ոչ մի լուսանկար»,- մեջբերում է նրա խոսքը գործակալությունը: Թուրքական իշխանությունները «մեզ ասացին, որ չեն կարող դա անել»՝ իրենց գործողությունները հիմնավորելով օրենքի սահմանափակումներով, նշել է նա:
Ըստ Աբդուլքարիմի՝ թուրք սահմանապահները բռնագրավել են Սիրիայի թանգարաններից և հնագիտական պեղումներից ԴԱԻՇ-ի գրոհայինների գողացած արդեն ավելի քան 2 000 առարկա: Գերատեսչության ղեկավարը նշում է, որ ի տարբերություն հարևան շատ երկրների՝ Թուրքիան հրաժարվում է Դամասկոսի հետ համագործակցել արժեքների գրանցման և վերադարձի հարցում: Գործը բարդ է նաև Իսրայելի հետ Թել-Ավիվի և Դամասկոսի միջև հարաբերությունների բացակայության պատճառով, հավելել է նա:
Թուրքիայի մշակույթի և զբոսաշրջության նախարարության ներկայացուցիչը, իր հերթին, չի համաձայնվել Աբդուլքարիմի հայտարարությունների հետ՝ դրանք անվանելով «անհիմն» և «քաղաքականապես մոտիվացված»: Նրա խոսքերով՝ ազգային սահմանամերձ ծառայության աշխատակիցները «վերջերս հրահանգավորվել են այդ հարցով և բոլոր բռնագրավված արվեստի առարկաները վերադարձվում են այն երկրների հաստատություններ, որտեղից բերվել են»:
