Չինաստանի Ժողովրդական Հանրապետության մայրաքաղաք Պեկինում դեկտեմբերի 11-ին տեղի է ունեցել առևտրատնտեսական հարցերով հայ-չինական համատեղ հանձնաժողովի 8-րդ նիստը: Ինչպես տեղեկացրին ՀՀ էկոնոմիկայի նախարարության տեղեկատվության եւ հասարակայնության հետ կապերի բաժնից, նիստի աշխատանքներին մասնակցել է ՀՀ էկոնոմիկայի նախարարի տեղակալ Սերգեյ Ավետիսյանի գլխավորած պատվիրակությունը: Պատվիրակության կազմում են ՀՀ էկոնոմիկայի, տարածքային կառավարման և արտակարգ իրավիճակների, արտաքին գործերի, գյուղատնտեսության, տրանսպորտի և կապի նախարարությունների, ինչպես նաև Հայաստանի զարգացման հիմնադրամի, ՀՀ առևտրաարդյունաբերական պալատի, ՀՀ արդյունաբերողների և գործարարների (գործատուների) միության ներկայացուցիչները:
Նիստի համանախագահներն են եղել հայկական կողմից` ՀՀ էկոնոմիկայի նախարարի տեղակալ Սերգեյ Ավետիսյանը, չինական կողմից` Չինաստանի կոմերցիայի նախարարության Եվրասիայի դեպարտամենտի տնօրեն Լին Ձին:
Ողջույնի խոսքում ՀՀ էկոնոմիկայի նախարարի տեղակալ Սերգեյ Ավետիսյանը վստահություն է հայտնել, որ նիստի ընթացքում, համատեղ ջանքերի շնորհիվ, կողմերին կհաջողվի հաստատել նոր կապեր և ձեռք բերել պայմանավորվածություններ տնտեսապես փոխշահավետ և երկարաժամկետ համագործակցության վերաբերյալ:
Նիստի ընթացքում քննարկվել են հայ-չինական առևտրատնտեսական համագործակցության զարգացմանն առնչվող մի շարք հարցեր, այդ թվում` որակի ենթակառուցվածքներին և տեխնիկական կանոնակարգմանը, գյուղատնտեսության, էներգետիկայի, տրանսպորտի, տեղեկատվական տեխնոլոգիաների և ինովացիաների, ավիացիայի ոլորտներում համագործակցության ընդլայնմանը, համատեղ գործարար համաժողովների, ցուցահանդեսների, տոնավաճառների կազմակերպմանն առնչվող և երկուստեք հետաքրքրություն ներկայացնող այլ հարցեր:
Պեկին կատարած այցի շրջանակում ՀՀ էկոնոմիկայի նախարարի տեղակալ Սերգեյ Ավետիսյանը հանդիպումներ է ունեցել Չինաստանի զբոսաշրջության ազգային ադմինիստրացիայի նախագահի և Չինաստանի քաղաքացիական ավիացիայի ադմինիստրացիայի նախագահի տեղակալի հետ: Քննարկվել են զբոսաշրջության և ավիացիայի ոլորտում համագործակցության հեռանկարները:
Հայկական պատվիրակությունը հանդիպում է ունեցել մի շարք չինական ընկերությունների ղեկավարության հետ, որի ընթացքում կողմերը քննարկել են փոխշահավետ գործարար կապեր հաստատելու հնարավորությունները:
Առևտրատնտեսական հարցերով հայ-չինական համատեղ հանձնաժողովը հիմնվել է համաձայն 1999 թվականի օգոստոսի 3-ին կնքված Արձանագրության:
Համատեղ հանձնաժողովի անդրանիկ նիստը կայացել է 1999 թվականին Երևանում:
