Այսօր առավոտից Երևանի Մալաթիա-Սեբաստիա համայնքի «Մալաթիա» տոնավաճառում իսկական խառնաշփոթ է: Տոնավաճառի բոլոր առևտրականները՝ շուրջ 1200 հոգի, միահամուռ կերպով հավաքել են իրենց ապրանքները և որոշել այլևս չաշխատել:
Մալաթիա-Սեբաստիա համայնքի թաղապետ Դավիթ Օհանյանը, ով եկել էր տոնավաճառ, բողոքը քննարկեց տոնավաճառի ղեկավարության հետ: Քննարկման ընթացքում որոշում կայացվեց առևտրականներին հորդորել անցնել աշխատանքի մինչև մայիսի 2-ը և այդ ընթացքում հարկեր ու վճարումներ չանել, բայց մինչև ամսի 2-ը թաղապետի և հարկային մարմինների մասնակցությամբ տոնավաճառում քննարկումներ կանցկացվեն տոնավաճառի ղեկավարության և առևտրականների ներկայացուցչի ու համապատասխան մարմինների միջև:
Դավիթ Օհանյանը խոստացավ, որ արդյունավետ քննարկումներ կանցկացնեն: Քննարկումից դուրս գալով՝ թաղապետը և առևտրականների ներկայացուցիչը շարունակեցին հորդորել մինչև մայիսի 2-ը աշխատել, սակայն նրանց հորդորին առևտրականները բուռն արձագանքեցին:
Առևտրականներին չգոհացրեց կայացված որոշումը: Նրանք ասացին, որ աշխատանքի չեն անցնի մինչև առարկայական փոփոխություն չտեսնեն:
Թաղապետ Դավիթ Օհանյանն «Առաջին լրատվական»-ին ասաց, որ ինքը Տարոն Մարգարյանի ցուցումով է տոնավաճառում, ով տեղյակ է խնդրից և մտահոգ է, թեև ինքը նույնպես առևտրականների բոլոր բողոքների դեպքում միշտ կանգնած է եղել նրանց կողքին:
Ըստ թաղապետի՝ սա առևտրականների հերթական պահանջն է, միգուցե՝ արդարացված, որին քննարկումների միջոցով կփորձեն լուծում տալ, ինչպես դա արեցին, երբ առևտրականները որոշ ժամանակ առաջ պահանջեցին ազատ օր ունենալ, որը չունեին։
Մալաթիայի թաղապետը քննարկեց առևտրականների բարձրացրած խնդիրը, սակայն առևտրականները չվերադարձան իրենց աշխատանքին:
