Այսօր առավոտից Երևանի Մալաթիա-Սեբաստիա համայնքի «Մալաթիա» տոնավաճառում իսկական խառնաշփոթ է: Տոնավաճառի բոլոր առևտրականները՝ շուրջ 1200 հոգի, միահամուռ կերպով հավաքել են իրենց ապրանքները և որոշել են այլևս չաշխատել:
Նրանց բողոքն ուղղված է իրենց տեղի վարձավճարների, հարկերի դեմ: Նրանցից ոմանք ասացին, որ 4 քառակուսի մետր տարածքի վրա իրենց առևտուրը կազմակերպելու համար յուրաքանչյուր ամիս վճարում են 120 հազար դրամ՝ այն դեպքում, երբ առևտուրը պակասել է, երկրում ժողովուրդ չի մնացել:
Նրանցից մի քանիսն «Առաջին լրատվական»-ի հետ զրույցում ասացին, որ չեն պատրաստվում աշխատել այնքան ժամանակ, մինչև երկրի ամենաբարձր ղեկավարությունը չվերանայի մոտեցումներն իրենց աշխատանքի վերաբերյալ: «Մալաթիա» տոնավաճառի առևտրական Ռուզաննա Բաղդասարյանն ասաց, որ իրենց բողոքն այն բանի դեմ է, որ իրենք այսքան հարկ ու տուրք են վճարում:
«Մի քիչ շնորհքով եղեք, մարդկանց աշխատանք չեք տալիս, ոչ մի աշխատատեղ չեք ստեղծել, իսկ ինչո՞ւ եք այսօրվա օրով մարդկանց դնում-սեղմում, որ այսքան հարկ տան, հերիք է հարկ տանք: Կներեք, ես այսօր գումար չունեմ տալու, վերջացել է, սպառվել է. ամեն ինչի վերջը մի օր գալիս է: Մի քիչ մտածեք մեր մասին, մեղք ենք, ձեր մեջքին մենք ենք կանգնած: Ոչ մեկ էլ կանգնած չէ ձեր մեջքին: 1993թ.-ից կանգնում եմ այստեղ, բավարարված եմ իմ ղեկավարից, ինքն ամեն ինչ էլ արել է մեզ համար, ամեն ինչ: Այդ մարդուց շնորհակալ ենք, բայց մի քիչ վերևները թող մտածեն. ասում են՝ ձուկը գլխից են բռնում: Հերիք եղավ-բոլ եղավ, մենք չլինենք՝ իրենք կորած են:
Ես ոչ մի անգամ պարտք չեմ ունեցել, իսկ ինչո՞ւ պետք է այսօրվա դրությամբ գումարից նեղվեմ, երբ այսպես աշխատել եմ: Երևի իրենց կանայք երբեք այսպես չեն աշխատել: Էլ արդեն ելք չկա, թող ելք գտնեն: Խանութները բացեցին, խանութների արենդաները իջեցրին, մերը բարձրացնում են՝ ինչո՞ւ: Եկամուտը տալիս ենք, լավ էլ պահում ենք ձեզ՝ ամեն ինչով, հերիք է, մի թույլ տվեք, որ ավելորդություններ խոսենք»,- ասաց առևտրականը:
«Առաջին լրատվական»-ը զրուցեց նաև այլ առևտրականների հետ:
Առաջարկում ենք մանրամասներին ծանոթանալ տեսանյութի միջոցով:
