Չնայած սահմանադրական փոփոխությունների հանրաքվեի քվեարկության օրը լրատվամիջոցների և դիտորդների արձանագրած մի շարք ընտրախախտումներին՝ սահմանադրական փոփոխություններին «Այո» ասող Հայ Յեղափոխական Դաշնակցությունը հանրաքվեն համարում է կայացած և լեգիտիմ։
ՀՅԴ խմբակցության քարտուղար Աղվան Վարդանյանն այսօր հայտարարեց՝ ամեն ինչ անթերի չի անցել, բայց ասել, որ հանրաքվեն լեգիտիմ չէ՝ սխալ է։
«Առաջին լրատվական»-ի հարցին, թե նախկինում չէր բացառվում, որ սահմանադրական փոփոխությունների հանրաքվեից հետո ՀՅԴ-ն կվերադառնա կոալիցիա, արդյոք այժմ նման քննարկումներ տարվո՞ւմ են, Վարդանյանը բացասական պատասխան տվեց, ասաց, որ Հանրապետական կուսակցության հետ կոալիցիա կազմելու շուրջ բանակցություններ Դաշնակցությունն այժմ չի վարում։
ՀՅԴ գերագույն մարմնի անդամ Լիլիթ Գալստյանը նշեց՝ Դաշնակցության գերագույն մարմինն առաջիկա օրերի ընթացքում կանդրադառնա բոլոր այն ընտրախախտումներին, որ տեղի են ունեցել հանրաքվեի օրը։
Գալստյանը հայտարարեց, որ իրենք տարիներ շարունակ պայքարել են, որ Հայաստանում ընտրական գործընթացը հնարավորինս թափանցիկ ու արդար լինի, և ցավում են, որ ընտրակեղծիքների կեղտն այսօր ակամայից իրենց էլ քսվեց:
Հայ Յեղափոխական Դաշնակցության 125-ամյակի առթիվ ՀՀ գիտությունների ազգային ակադեմիայի նախագահության նիստերի դահլիճում այսօր տեղի ունեցավ «Հ.Յ. Դաշնակցությունը և Հայոց պետականությունը» թեմայով գիտաժողով:
Դաշնակցական Լևոն Մկրտչյանը ձեռնպահ մնաց հանրաքվեի քվեարկության ընտրախախտումների վերաբերյալ գնահատական հնչեցնելուց։ Վերջինս անդրադարձավ միայն այն բոլոր դրական զարգացումներին, որոնք իր տպավորմամբ՝ Հայաստանին սպասվում է խորհրդարանական կառավարման համակարգին անցնելուց հետո։
