Երևանի Մալաթիա-Սեբաստիա համայնքի «Մալաթիա» տոնավաճառում իսկական խառնաշփոթ է: Բոլոր առևտրականները միահամուռ կերպով հավաքել են իրենց առևտրի կետերը և որոշել են ընդհանրապես չաշխատել:
Նրանցից մի քանիսն «Առաջին լրատվական»-ի հետ զրույցում ասացին, որ չեն պատրաստվում աշխատել այնքան ժամանակ, մինչև երկրի ամենաբարձր ղեկավարությունը չվերանայի իր մոտեցումներն իրենց աշխատանքի վերաբերյալ: Նրանց բողոքը մասնավորապես տեղի բարձր հարկերից է, որոնց միջոցով, ըստ նրանց, պարզապես «քերթում են» իրենց: Դրա արդյունքում առևտրականներն իրենց ապրանքների գներն են բարձրացնում, որի հետևանքով էլ հաճախորդ չեն ունենում: Օրեր շարունակ նստում են իրենց տեղերում և աչքերով հաճախորդ փնտրում։
«Այսպես այլևս անհնար է, մենք չենք դիմանում, մենք արժանապատիվ մարդիկ ենք, այլևս տեղ չունենք: Թող ցածրացնեն հարկերը մոտավորապես 50 տոկոսով: Դրանք բոլորը մեզնից են կախված, թող մտածեն մեր մասին: Մենք տոնավաճառի ղեկավարությունից որևէ դժգոհություն չունենք, մեր դժգոհությունը երկրի նախագահից է ու երկրի ղեկավարությունից»,- նշեց առևտրական տիկին Բաղդասարյանը:
Մալաթիա-Սեբաստիա համայնքի թաղապետ Դավիթ Օհանյանը, ով եկել էր տոնավաճառ, բողոքը քննարկում էր տոնավաճառի ղեկավարության հետ:Քննարկման ընթացքում որոշում կայացվեց առևտրականներին հորդորել անցնել աշխատանքի մինչև մայիսի 2-ը և այդ ընթացքում հարկեր ու վճարումներ չանել, բայց մինչև ամսի երկուսը թաղապետի և հարկային մարմինների մասնակցությամբ տոնավաճառում քննարկումներ կանցկացվեն տոնավաճառի ղեկավարության և առևտրականների ներկայացուցչի ու համապատասխան մարմինների միջև:
Դավիթ Օհանյանը խոստացավ, որ արդյունավետ քննարկումներ կանցկացնեն: Քննարկումից դուրս գալով՝ թաղապետը և առևտրականների ներկայացուցիչը շարունակեցին հորդորել մինչև մայիսի 2-ը աշխատել, սակայն նրանց հորդորին առևտրականները բուռն արձագանքեցին: Նրանք ասացին, որ աշխատանքի չեն անցնի մինչև առարկայական փոփոխություն չտեսնեն:
Դավիթ Օհանյանն «Առաջին լրատվական»-ին ասաց, որ ինքը Տարոն Մարգարյանի ցուցումով է տոնավաճառում, ով տեղյակ է խնդրից և մտահոգ է, թեև ինքը նույնպես միշտ կանգնած է եղել առևտրականների կողքին նրանց բոլոր բողոքների դեպքում: Ըստ թաղապետի՝ սա առևտրականների հերթական պահանջն է, միգուցե արդարացված, որին քննարկումների միջոցով կփորձեն լուծում տալ, ինչպես դա արեցին երբ առևտրականները որոշ ժամանակ առաջ պահանջեցին ազատ օր ունենալ, որը չկար։
Ականջալուր չլինելով թաղապետի և տոնավաճառի ղեկավարի հորդորներին՝ առևտրականներն այս պահին շարունակում են իրենց բողոքը, չեն վերադառնում իրենց աշխատանքին՝ պահանջելով ավելի կոնկրետ քայլեր։ «Թող ձեռք չառնեն մեզ»,- ասում են նրանք: