Եթե հիշում եք, Գյումրիի նախկին քաղաքապետ Վարդան Ղուկասյանը իր պաշտոնավարման տարիներին Գյումրիի գլխավոր հրապարակը անվանափոխեց Վարդանանց հրապարակ, և բոլոր նրանց, ովքեր պնդում էին, թե քաղաքապետն իր անունով է անվանակոչել հրապարակը, հակադարձում էր, թե գլխավոր հրապարակը Վարդանանց է կոչել, քանի որ գյումրեցիները մասնակցել են Վարդանանց պատերազմին: Ընդ որում` դա հենց Վարդան Ղուկասյանի պատմագիտական բացահայտումն էր: Գյումրիում կրակոցներով ու սպանությամբ զուգորդված վերջին միջադեպից հետո այժմ գյումրեցիներին կարծես նոր «Վարդանանց պատերազմ» է սպառնում, չնայած երեկ Գյումրի գնացած ոստիկանապետ Վլադիմիր Գասպարյանը սպառնաց երկրից «արտաքսել» «երկու կլանների» ներկայացուցիչներին` միջադեպի շարունակության դեպքում: Ինչպես արդեն տեղեկացրել ենք, Գյումրիում արդեն իսկ հայտարարություններ են եղել, որ թափված արյան համար պատասխան են տալու: Երեկ զրուցեցինք Գյումրիի ՀՀԿ կառույցի ղեկավար Սահակ Մինասյանի հետ, ով կառույցը ղեկավարեց այն ժամանակ, երբ Ղուկասյանը պաշտոնանկ արվեց ու լքեց ՀՀԿ Գյումրիի ղեկավարի պաշտոնը:
– Պարոն Մինասյան, Ձեր կուսակցության անդամ է ներգրավված այս միջադեպում, Ձեր գնահատականը ո՞րն է կատարվածի վերաբերյալ: Տեղեկություններ կան, որ Գյումրիում այսօր որոշակի լարված իրավիճակ է, ոմանք զայրացած են, ոմանք վախեցած:
– Ասեմ, որ միայն մեր կուսակցության անդամ չի, նշվում են տարբեր կուսակցությունների անուններ: Եվ անկախ անձի կուսակցական պատկանելությունից` ցանկացած հակահասարակական արարք դատապարտելի է: Իսկ վերջնական գնահատական տվողը իրավապահ մարմիններն են: Բնականաբար, քննարկումներ, վրդովմունք, անշուշտ, կա, բայց վախի մթնոլորտ չկա, որովհետև հստակ իրավապահ մարմինները վերահսկում են իրավիճակը, և ավելորդ իրարանցման, ավելորդ վախի իրավիճակ քաղաքում այսօր չկա: Իսկ քննարկումներ, բնականաբար, հասարակությունում կլինեն և կան: Դատապարտում են երկուստեք:
– Այդ դեպքում հնարավո՞ր է Գյումրիի ՀՀԿ կառույցը հանդես գա դատապարտող հայտարարությամբ:
– Ես կարծում եմ, որ ՀՀԿ կառույցը դատապարտող հայտարարությամբ հանդես գալու խնդիր չունի, որովհետև խնդիրը հանրության բոլոր շերտերում քննարկման առարկա է դարձել, իրավիճակը վերահսկվում է, հետո ես ծայրահեղ չեմ ուզում մեզանում ընթացող թե լավ, թե վատ արարք փորձ անենք, տանենք քաղաքականության դաշտ, տանք քաղաքական գնահատական: Կուսակցության հայտարարությունը նշանակում է խնդիրը մասամբ տեղափոխել քաղաքական դաշտ, որին ես դեմ եմ: Քաղաքականությունը հասարակական կարգի պահպանմանն ուղղակիորեն առնչվող ինստիտուտ չէ:
– Պարոն Մինասյան, այսօր խոսվում է, որ հնարավոր է Գյումրիում միջադեպը շարունակություն ունենա, որ թափված արյան համար պատասխան են տալու:
– Ես չեմ կարծում, անգամ կոչ եմ անում ողջախոհության և խնդիրը տեղափոխելու ընդհանուր փոխըմբռնման դաշտ: Ես կարծում եմ` դա ավելի շատ երևակայություն է, և գյումրեցիները ունեն համապատասխան ողջախոհություն: Ոստիկանապետի այցելությունը Գյումրի փաստում է իմ ասածը, որ ամեն ինչ վերահսկվում է ծայրահեղ զգոնությամբ, և ոչ մի շարունակություն ունենալ չի կարող, բացառվում է:
– Կարծում եք` սպանությունից հետո հնարավո՞ր է հաշտության դաշտ տանել խնդիրը:
– Իհարկե, ես կարող եմ պատմական օրինակներով ասել, բայց ամփոփ մտքով հետևյալը կասեմ` վրեժն ու հաշտվողականությունը երկվորյակներ են, առերևույթ տարբեր, բայց նույն սեփական հոգու էմոցիաներ են: Էնպես որ, մի բացառեք:
– Նախորդ միջադեպից հետո, փաստորեն, ներողամտություն չեղավ, և սա նախորդ միջադեպի շարունակությունն է:
– Ճիշտն ասած` ես նախորդ միջադեպից տեղեկատվություն հստակ չունեմ:
– Դուք Ձեր կուսակցի` Վարդան Ղուկասյանի հետ հանդիպե՞լ եք, և ո՞րն է միջադեպի վերաբերյալ նրա բացատրությունը:
– Ես Վարդան Ղուկասյանի հետ չեմ հանդիպել, ոչ էլ Մարտուն Գրիգորյանին եմ հանդիպել:
– Այսօր Երևանի ավագանու ընտրությունների նախաշեմին արդեն իսկ որոշակի լարվածություն կա ՀՀԿ-ի և ԲՀԿ-ի միջև, չե՞ք կարծում, որ այս միջադեպը հնարավոր է ավելի սրի իրավիճակը երկու կուսակցությունների միջև:
– Ոչ թե չեմ կարծում, այլ բացառում եմ, որովհետև Երևանի քաղաքապետի ընտրությունները տեղական կառավարման ընտրություններ են, բնականաբար կարող է լինել մրցակցություն, իսկ խնդիրը քաղաքականացնելը, չեմ կարծում, ճիշտ մոտեցում է: