Իրաքի իշխող Ազգային դաշինքը վարչապետ Հեյդար Ալ-Աբադիին Թուրքիայի դեմ պատասխան միջոցների թույլտվություն է տվել, եթե Անկարան հրաժարվի հանել իր զորքերը արաբական պետության տարածքից: Այս մասին հայտնել է իրաքյան «Աս-Սումարիա» հեռուստաալիքը:
Հաղորդվում է, որ խոսքը «ցանկացած անհրաժեշտ միջոցների մասին է երկրի սահմանների և ինքնիշխանության պաշտպանության համար, այդ թվում՝ դիմում ՄԱԿ-ի ԱԽ, Արաբական պետությունների լիգա»: Հնարավոր են նաև տնտեսական պատժամիջոցներ, որոնց մանրամասների մասին չի հաղորդվում: «Ազգային դաշինքի անդամները որոշել են լիովին աջակցել վարչապետի գործողություններին սահմանադրության կետերի համաձայն»,- մեջբերում է «Աս-Սումարիան» կոալիցիայի համատեղ հայտարարությունը:
Ավելի վաղ, իրաքյան ԶԼՄ-ների պնդմամբ, Ալ-Աբադին հրահանգել է բարձր մարտական պատրաստության վիճակի բերել Իրաքի ռազմաօդային ուժերը:
Դեկտեմբերի 4-ին Թուրքիան իր զինված ուժերի խումբը, ներառյալ՝ մոտ 130 զինծառայող, տանկեր և հրետանի, տեղակայել է քուրդ աշխարհազորայինների ճամբարում Իրաքի հյուսիսային Նայնավա նահանգում, որտեղ Անկարան մարզում է քուրդ մարտիկներին ԴԱԻՇ-ի գրաված Մոսուլի վրա հարձակման համար:
Դեկտեմբերի 6-ին Իրաքի ԱԳՆ-ն Բաղդադում թուրք դեսպանին կանչել է և պահանջել, որ Թուրքիան անհապաղ իր զորքերը դուրս բերի Իրաքի տարածքից: Իրաքի ԱԳՆ-ն նաև հայտարարել է, որ Անկարան զորքերը մտցրել է առանց Բաղդադի համաձայնության, որն այդ քայլը որակում է «թշնամական ակտ»:
Նույն օրը Իրաքի նախագահ Ֆուադ Մաասումը պահանջել է թուրքական ստորաբաժանումներն ահապաղ դուրս բերել Իրաքի տարածքից՝ նրանց մտնելն անվանելով «միջազգային նորմերի և իրավունքի խախտում»: Նա 48 ժամ է տվել ստորաբաժանումների դուրսբերման համար և հակառակ դեպքում չի բացառել ՄԱԿ ԱԽ-ին դիմելը:
Միևնույն ժամանակ, Թուրքիան դեռ հրաժարվում է զորքերը դուրս բերել և պնդում է, որ զինծառայողներն այնտեղ են ահաբեկչական խմբավորումների դեմ կռվող «տեղի ոստիկանության համար ուսումնական ծրագրի շրջանակներում»:
