Եվրասիական տնտեսական հանձնաժողովը մոտ ժամանակներս մտադիր է Իսրայելի հետ բանակցություններ սկսել ազատ առևտրի գոտու հարցով։ Այս մասին հայտնել է հանձնաժողովի ինտեգրացիոն զարգացման դեպարտամենտի տնօրեն Վիկտոր Սպասկին՝ փոխանցում է RIA Novosti-ն։
«Ներկայում մենք ծրագրում ենք բանակցային գործընթաց սկսել Իսրայելի հետ ազատ առևտրի գոտու մասին նոր համաձայնագրի շուրջ»,- ասել է Սպասկին Doing Business with Eurasian Union համաժողովի կուլիսներում։
Պաշտոնական բանակցությունների մեկնարկի մասին որոշումն ընդունվել է փորձագետների տևական աշխատանքի արդյունքում։ Համատեղ հետազոտական խումբը եզրակացություն է արել նման գոտու ստեղծման նպատակահարմարության մասին։
Իսրայելի համար սպասվում է ԵՏՄ պետությունների հետ առևտրաշրջանառության 6-8 տոկոս աճի արդյունք, ԵՏՄ-ի համար սպասվում է փոքր փոփոխություն, սակայն ինտեգրումը կբարձրացնի Իսրայելի հետ տնտեսական հարաբերությունների որակը՝ ակտիվացնելով ներդրումային գործընթացն ու տեխնոլոգիաների փոխանցումը։
