Հանրապետականները քննադատել են ԱՄՆ նախագահ Բարաք Օբամայի ուղերձը ժողովրդին և հայտարարել են, որ ԱՄՆ նախագահը չի կարող հաղթահարել ԴԱԻՇ-ին, ոչ ճիշտ դիրքորոշում ունի զենքի վերահսկողության հարցում և թուլություն է ցուցաբերում մահացու վտանգների առաջ: Այս մասին գրում է The New York Times-ը:
Ֆլորիդա նահանգից սենատոր Մարկ Ռուբիոն հայտարարել է, որ ներկայումս քաղաքացիները վախեցած են, և նախագահի խոսքը չի կարողացել նրանց համոզել, որ ԱՄՆ-ում անվտանգ է:
«Նա անկեղծորեն հավատում է, որ կա կոալիցիա, որը պայքարում է ԴԱԻՇ-ի դեմ: Դա անհեթեթություն է: Ոչ մի կոալիցիա չկա: Միայն երկրների խումբ, որոնք համաձայնել են ստորագրել թղթի վրա»,- ասել է Ռուբիոն:
Դեռ նախագահական խոսքից առաջ հանրապետական Թեդ Կրուզն Օբամային կոչ է արել սկսել օգտագործել «արմատական իսլամական ահաբեկչություն» արտահայտությունը: Օբաման մերժել է այդ խնդրանքը՝ պատասխանելով, որ նման արտահայտությունները «կանարգեն մուսուլմաններին»: Ավելի ուշ Կրուզն ԱՄՆ նախագահից պահանջել է «չարիքին հաղթելու համար վճռական գործողությունների ծրագիր»: Նա հավելել է, որ նախագահը սխալմամբ Սան Բեռնարդինոյում հրաձգությունը կապում է զենքի վաճառքի վերահսկողության հետ: Ըստ Կրուզի՝ ահաբեկչություններից խուսափելու համար ԱՄՆ-ը պետք է դադարեցնի փախստականների ընդունումը:
