Հայաստանը 54 երկրների շարքում զբաղեցնում է 22-րդ հորիզոնականը տնտեսական լավատեսության մակարդակով: Այս մասին վկայում են WIN-Gallup International Association-ի «Հույսի և հիասթափության գլոբալ բարոմետր» հետազոտության արդյունքները:
Gallup International Association միջազգային հետազոտական կենտրոնը հրապարակել է տարբեր երկրների բնակիչների ամենամյա հարցման արդյունքները այն մասին, թե՝ ինչ ակնկալիքներ են նրանք կապում գալիք տարվա հետ: Հարցումն անցկացվել է 2012թ. «Հույսի և հիասթափության գլոբալ բարոմետր» (Global Barometer on Hope and Happiness) համաշխարհային հետազոտության շրջանակներում: Հարցմանը մասնակցել է 60 հազար մարդ՝ աշխարհի 54 երկրներից:
Մասնակիցներին հարցեր են տրվել 2013թ. տնտեսական հեռանկարների և կանխատեսումների վերաբերյալ:
Հետազոտության տվյալների համաձայն՝ 2013թ. Հայաստանում տնտեսական հույսի ինդեքսը կազմել է -11%: Այսպիսով, Հայաստանը պատկանում է այն երկրների խմբին, որոնք հոռետեսորեն են տրամադրված տնտեսական հեռանկարների հարցի շուրջ: Հատկանշական է, որ այս խմբի մեջ մտել են այնպիսի զարգացած երկրներ, ինչպիսիք են՝ ԱՄՆ-ը (21-րդ հորիզոնական՝ -8% ինդեքսով), Կանադան (23-րդ հորիզոնական՝ -12%), Սինգապուրը (28-րդ հորիզոնական՝ -17%), Շվեդիան (34-րդ հորիզոնական՝ -28%), Գերմանիան (47-րդ հորիզոնական՝ -46% ինդեքսով): Այս խմբի մեջ է ներառվել նաև Ռուսաստանը՝ 31-րդ հորիզոնական՝ -23% ինդեքսով:
2013թ. տնտեսական հեռանկարների հանդեպ ամենալավատեսը Վրաստանն է, որի տնտեսական հույսի ինդեքսը կազմում է 63%: Լավատես երկրների շարքին է դասվում նաև Ադրբեջանը, որը զբաղեցրել է 2-րդ հորիզոնականը՝ 56% ինդեքսով: