Երեկ մենք տեղեկացրել էինք, որ ԱՄՆ նախագահ Բարաք Օբաման իր ծննդավայրի և քաղաքացիության մասին շահարկումներից խուսափելու համար ներկայացրել է իր ծննդականի պատճենը:
Հյուրընկալվելով հայտնի հեռուստահաղորդավար Օփրա Ուինֆրիին` Օբաման պատմել է, որ այդ ծննդականի պատճենը տրամադրելու համար Հավայան կղզիների համապատասխան մարմինները ստիպված են եղել օրենք խախտել:
«Երկու շաբաթ առաջ մենք քննարկում էինք բյուջեի նախագիծը: Ես հանդես եկա ծրագրային ելույթով, հանրապետականներն` իրենց առաջարկներով, սակայան ամենամեծ լուրը մամուլում իմ ծննդականի օրիգինալի հետ էր կապված», ասել է Օբաման Օփրային:
Օբաման պատմել է, որ դրանից հետո ինքը դիմել է իր թիմի անդամներին, որպեսզի Հավայան կղզիներից ստանան ծննդականի բնօրինակը, քանի որ այդ թեման փակել էր պետք. «Թեպետ Հավայներում այդպիսի փաստաթղթեր արդեն չեն էլ տրամադրում (փոխել են դրանք էլեկտրոնայինի)»,- ասել է Օբաման` նշելով, որ իր համար բացառություն է արվել, և այդ թուղթը տրամադրել են:
ԱՄՆ-ում Օբամայի վարչակազմում լուրջ մտահոգություն էր առաջացրել այն փաստը, որ ամերիկացիների մեծամասնությունը սկսել էր կասկածել նախագահի` ԱՄՆ-ում ծնված լինելու փաստին, ինչը նախագահական ընտրությունների քարոզարշավի նախօրեին վատ մեկնարկ կարող էր ապահովել: Այդ պատճառով վարչակազմը որոշում է կայացրել չուշացնել և ներկայացնել ծննդականի բնօրինակը` բոլոր քննարկումները փակելու համար:
Այս ամենի հիմնական «մեղավորներից» մեկը` միլիարդատեր Դոլանդ Տրամպը, որը ամենաշատ կասկածներն ուներ այդ փաստաթղթի կապակցությամբ, երեկ ասել է, որ ինքը բավարարված է այդ փաստաթղթի հրապարակմամբ, սակայն հիմա էլ տարակուսանք է հայտնել, թե ինչու Օբաման ավելի շուտ չէր հրապարակում այն:
