Ռուսական TASS լրատվական գործակալության փոխանցմամբ՝ Ռուսաստանը բացարձակապես անընդունելի է համարում թիկունքին հասցրած դավաճանական հարվածները նրանց կողմից, որոնց համարել է ահաբեկչության դեմ պայքարում գործընկեր ու դաշնակից։ Այս մասին օտար երկրների դեսպանների հետ հանդիպման ժամանակ հայտարարել է Ռուսաստանի նախագահ Վլադիմիր Պուտինը։ Նա այդ կերպ է մեկնաբանել Թուրքիայի ռազմաօդային ուժերի կողմից երկու օր առաջ ռուսական «Սու-24» ինքնաթիռի խոցումը։
Նրա խոսքով՝ Թուրքիան մինչ այժմ «Սու-24»-ի խոցման համար բարձր մակարդակով ներողություն չի խնդրել Ռուսաստանից, չի առաջարկել փոխհատուցել վնասը և չի խոստացել պատժել մեղավորներին. «Տպավորություն է ստեղծվում, որ Թուրքիայի ղեկավարությունը ռուս-թուրքական հարաբերությունները գիտակցաբար մղում է դեպի փակուղի։ Մենք ցավում ենք դրա համար։ Այն, ինչ տեղի ունեցավ երկու օր առաջ, հակասում է առողջ մտածելակերպին ու միջազգային իրավունքին»։
