ԱՄՆ Ռազմածովային ուժերի ռազմաբազայում գտնվող հատուկ բանտում հացադուլին մասնակցում է բանտարկյալների կեսից ավելին՝ 84 մարդ: Այս մասին հայտնում է Associated Press-ը՝ հղում անելով Պենտագոնի ներկայացուցիչ Սեմյուել Հաուսին: Կուբայում գտնվող ամերիկյան բանտում ընդհանուր առմամբ պահվում է 166 մարդ:
Գուանտանամոյում հացադուլին մասնակցող 84 կալանավորներից 16-ին բռնի կերակրում են, իսկ 5-ին հոսպիտալացրել են: Հաուսի խոսքով՝ հոսպիտալացվածների կյանքին վտանգ չի սպառնում:
Հացադուլը Գուանտանամոյում սկսվել է այս տարվա փետրվարին, սակայն ավելի վաղ հացադուլին մասնակցողների թիվը փոքր էր: Նրանք բողոքում են բանտային ծանր պայմանների դեմ ու պահանջում են իրենց գործերով դատական գործընթացներ անցկացնել: Բանտարկյալների մի մասն ավելի քան 10 տարի այնտեղ է պահվում առանց մեղադրանքի առաջադրման: Ապրիլի 14-ին բանտարկյալների ու անվտանգության ծառայողների միջև տեղի էր ունեցել ընդհարում. այդ պահին հացադուլին մասնակցում էր արդեն 43 մարդ:
