Սաուդյան Արաբիան վերադարձրել է խոշորագույն նավթարդյունահանող երկրի կոչումը՝ այս տարվա 9 ամիսների արդյունքներով 2003-ից ի վեր առաջին անգամ ամենաբարձր տեղը զբաղեցնելով աշխարհում «սև ոսկու» արդյունահանմամբ։ Այս մասին հայտնում է սաուդյան «Ալ-Իկտիսադիա» թերթը։
Պարբերականի տվյալներով՝ Սաուդյան Արաբիան 9 ամիսների ընթացքում միջինը օրական արդյունահանել է 10.19 մլն բարել նավթ։ Ռուսաստանը, որը հայտնվել է երկրորդ տեղում, այդ ընթացքում արդյունահանել է օրական միջինը 10.12 մլն բարել։
«Ալ-Իկտիսադիա»-ի փոխանցմամբ՝ նավթարդյունահանման ներկայիս ծավալներն ամենաբարձրն են Սաուդյան Արաբիայի նավթային արդյունաբերության ամբողջ պատմության ընթացքում։ Մինչ այդ թագավորությունն ամենից շատ նավթ արդյունահանել էր 2012 թվականին՝ օրական 9.8 մլն բարել։ Այդ ժամանակ մեկ բարելի արժեքը եղել է 112 դոլար:
Այս տարվա առաջին 9 ամիսներին նավթի արդյունահանումն աշխարհում մեծացել է 1.8 տոկոսով՝ հասնելով օրական 74.2 մլն բարելի։ Այդ կերպ շուկայի մասնակիցները փորձել են փոխհատուցել վնասները՝ կապված ուժեղ գնանկման հետ։
