Թուրքական Anadolu լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն չի բացառել, որ Անկարան կարող է միջոցներ ձեռնարկել՝ Սիրիայի թուրքմեններին պաշտպանելու համար։ Դավութօղլուն չի մանրամասնել, թե ինչ միջոցներ կլինեն դրանք։
Դավութօղլուն ընդգծել է, որ եթե շարունակվեն հարձակումները, որոնք կհանգեցնեն Թուրքիա փախստականների ինտենսիվ հոսքի, ապա անհրաժեշտ միջոցներ կձեռնարկվեն ինչպես Թուրքիայում, այնպես էլ Սիրիայում. «Մենք կձեռնարկենք նաև անհրաժեշտ դիվանագիտական քայլեր՝ ցաբնկացած տիպի սպառնալիքից պաշտպանելու մեր եղբայրներին ու քույրերին այնտեղ, որտեղ գտնվում են նրանք և մեր շահերը։ Տվյալ տարածաշրջանում չկան ԴԱԻՇ-ի զինյալներ»։
Դավութօղլուն հավելել է, որ Սիրիայի թուրքմենների հարցերով մշտական շփման մեջ են Թուրքիայի զինված ուժերի Գլխավոր շտաբի պետ, բանակի գեներալ Հուլուսի Աքարը ու Ազգային հետախուզական (MIT) ղեկավար Հաքան Ֆիդանը։
Ավելի վաղ Անկարայում Ռուսաստանի դեսպան Անդրեյ Կառլովը կանչվել էր Թուրքիայի ԱԳՆ, պահանջվել էր, որ Ռուսաստանն անհապաղ դադարեցնի Սիրիայի թուրքմենների բնակավայրերի ռմբակոծությունները։
