McDonald’s արագ սննդի ռեստորանների ցանցը 355 հազար դոլարի չափով տուգանք կվճարի ԱՄՆ միգրացիոն օրենքների խախտման համար։ Այս մասին ասվում է երկրի արդարադատության նախարարության հաղորդագրությունում՝ փոխանցում է TASS գործակալությունը։
Կողմերը նման որոշման են հանգել մինչդատական կարգով։
«Հաշտության համաձայնագրի համապատասխան՝ McDonald’s-ը 355 հազար դոլար կվճարի որպես վարչական տուգանք»,- նշվում է հայտարարության մեջ։
Քննությամբ պարզվել է, որ երկար ժամանակ կազմակերպության ղեկավարությունը խախտել է երկրի օրենսդրությունը։ ԱՄՆ-ում կեցության ժամկետանց իրավունքով ներգաղթյալ աշխատողներից ընկերությունը պահանջել է թարմացված փաստաթուղթ, ինչն արգելված է։ Ընկերությունն ամերիկացի աշխատողներից նոր փաստաթղթեր չի պահանջել՝ հնի ժամկետը լրանալուց հետո։ Նման վարքը դիտվում է որպես խտրականություն ներգաղթյալ աշխատողների հանդեպ։
ԱՄՆ իշխանությունները հայտնել են, որ McDonald’s-ը համաձայնել է փոխհատուցում վճարել նախկին աշխատողներին, ովքեր ստիպված են եղել հեռացվել ընկերության նման պրակտիկայի պատճառով։
