Էռնեստ Հեմինգուեյի հիշողությունների գիրքը՝ «Տոն, որը միշտ քեզ հետ է», դարձել է Փարիզում վաճառքի հիթ՝ նոյեմբերի 13-ի հարձակումների շարքից հետո, որոնց հետևանքով զոհվել է շուրջ 130 մարդ։
France Presse գործակալության հետ զրույցում Folio ֆրանսիական հրատարակչատան ներկայացուցչը հայտնել է, որ սովորաբար Փարիզի գրախանութներում օրական վաճառվում է այդ գրքի 10 օրինակ, սակայն այժմ վաճառքը հասել է օրական 500-ի։
Այն նաև վաճառքի առաջատար է դարձել Amazon-ի ֆրանսիական կայքում կենսագրական գրքերի շարքում։
Փարիզցիները հաճախ այդ ողբերգության վայրեր են բերում գրքի օրինակներ՝ ծաղիկների ու մոմերի հետ, զոհերի հիշատակը հարգելու համար։
Համացանցում մեծ ժողովրդականություն է վայելում տեսահոլովակը, որում Դանիել անունով 77-ամյա փարիզցին ֆրանսիացիներին կոչ է անում կարդալ Հեմինգուեյի գիրքը երկրի համար դժվարին օրերին։
1964 թվականին հրատարակված հիշողությունների գրքում Հեմինգուեյը նկարագրում է իր կյանքը Փարիզում 1920-ականներին և իր առաջին գրական փորձերը։
