ԱՄՆ Հետաքննությունների դաշնային բյուրոյի տնօրեն Ջեյմս Կոմին Նյու Յորքի կիբեռանվտանգության համաժողովում իր ելույթում հայտարարել է, որ ԴԱԻՇ-ի կողմից օգտագործվող գաղտնագրերը նրանց փակուղու առջև է կանգնեցրել, հայտնում է RIA Novosti-ն:
Նրա խոսքով` բյուրոն սոցցանցերում հետևում է հավաքագրողների և պոտենցիալ ահաբեկիչների նամակագրությանը, և դատարանի որոշումից հետո հետևում է «զինյալներին համակրող» քաղաքացիների էլեկտրոնային փոստին: Սակայն հենց ինչ-որ մեկը ցանկություն է հայտնում դառնալ մահապարտ, ահաբեկիչներն անցնում են կոդավորված հարթակին:
Նրա խոսքով` Փարիզի ահաբեկչությունը կարող է լուրջ պատճառ դառնալ այնպիսի օրենք ընդունելու, որտեղ ազգային անվտանգության հետաքրքրություններն ավելի բարձր դասվեն, քան քաղաքացու գաղտնի նամակագրության իրավունքը:
ԴԱԻՇ-ը ցուցաբերել է տեխնոլոգիաների լուրջ իմացություն. ծայահեղականները հրատարակել են ուսուցողական ձեռնարկ, թե ինչպես նվազագույն ծախսերով խուսափել էլեկտրոնային հետապնդումներից, ինչպես նաև թողարկել է 8-րոպեանոց տեսանյութ, որում պատմում է հատուկ ծառայությունների կողմից հեռախոսների լսումներից և հետապնդումներից խուսափելու հնարավորության մասին: ԴԱԻՇ-ը նաև կազմել է կողմնակի ներթափանցումից ավելի լավ պաշտպանված բջջային սարքեր արտադրողի և ծրագրեր մշակողների վարկանիշ:
Նույն կոնֆերանսում ելույթ ունենալով` Մանհեթենի շրջանային դատախազ Սայրուս Վենսն ասել է, որ նույնիսկ դատարանի որոշումը չի օգնել ավելի քան հարյուրավոր դեպքերում մուտք գործել բջջային սարքավորումներ: Apple Inc.-ի և Google-ի նոր օպերացիոն համակարգերը թույլ չեն տվել մտնել օգտվողի հեռախոսը առանց գաղտնագրի: Անգամ արտադրող ընկերություններն են անկարող եղել «ջարդել» իրենց արտադրանքը:
Անցյալ տարի Apple-ի տնօրեն Թիմ Կուկը հայտարարել էր, որ օգտվողների անձնական կյանքի անվտանգությունը և գաղտնիությունը հիմնարար է Apple-ի սարքերի համար:
