Գյումրիում կան ավելի քան երկու հարյուր տնակներ, որոնք ժամանակի ընթացքում բնակիչ տնակատերերի կողմից քարապատվել են, ավելացվել կոմունալ հարմարություններ, ու վերածվել փաստացիորեն սեփական տան, սակայն մինչ այսօր շարունակվում են մնալ տնակի կարգավիճակում: Այսօր Գյումրու քաղաքապետ Սամվել Բալասանյանի որոշմամբ, այդ երկու հարյուր ընտանիքներից տասն ընտանիքի հանդեպ կայացվեց որոշում, որով վերջիններս դարձան իրենց տնակների սեփականատեր:
Ինչպես «Առաջին լրատվական»-ի հետ զրույցում նշեց Գյումրու գլխավոր ճարտարապետ Հենրիկ Գասպարյանը, ընտրվել են այն ընտանիքները, որոնց զբաղեցրած տարածքները կարելի է օտարել և այդտեղ չի գործում ՀՀ Հողային օրենսգրքի 60-րդ հոդվածով սահմանված արգելքները, նաև այդ տարածքները չեն հանդիսանում քաղաքի համար մոտակա ժամանակահատվածում քաղաքաշինական աշխատանքների համար ենթակա տարածքներ:
«Միաժամանակ, նաև ուշադրություն ենք դարձրել, որպեսզի այդ տնակներն ապահովված լինեն գոնե նվազագույն կոմունալ կենցաղային պայմաններով. ջուր, կողյուղի, բաղնիք, զուգարան»,- մանրամասնում է պարոն Գասպարյանը և հավելում, որ ըստ գործընթացի, այս ընտանիքները գնալու են Կադաստրի պետական կոմիտե, ու գրանցվելու են այնտեղ, իսկ համայնքն էլ իր կողմից կտրամադրի հասցեները:
Անդրադառնալով կանաչ գոտիներում տեղադրված տնակներին, պարոն Գասպարյանը նշեց, որ առաջիկայում ուսումնասիրվելու են այդ տարածքները ևս, և եթե դրանք արդեն համարվեն անվերականգնելի տեխնիկական միջոցով, ապա դրանց հարցը ևս կլուծվի. դրանք ևս կներկայացվեն համապատասխան առաջարկությունների տեսքով հաստատման, ու այդ տնակատերերը ևս հնարավոր է կարողանան դառնալ իրենց քարաշեն կամ քարապատ տնակների սեփականատեր:
