Անցյալ տարի սկսված նավթի էժանացման հետևանքով Ադրբեջանի նավթային եկամուտները 8.7 մլրդ դոլարով նվազել են: Այս մասին հայտնում է «Ազադլըգ» թերթը` հղում անելով Ադրբեջանի պետական մաքսային ծառայության զեկույցին:
Ըստ այդ զեկույցի` 2015 թվականի 10 ամիսների ընթացքում նավթի հումքի վաճառքից Ադրբեջանի եկամուտը 2014 թվականի նույն ժամանակաշրջանի համեմատ 53.4 տոկոսով փոքր է:
Թերթը գրում է, որ, կանխատեսումների համաձայն, Ադրբեջանի պետական նավթային հիմնադրամը, որը հանդիսանում է պետբյուջեն ձևավորող հիմնական աղբյուրը, պակասորդով կփակի նաև 2016 թվականը:
«Թուրան» լրատվական գործակալությունն ավելի վաղ հաղորդել էր, որ նավթ արդյունահանող երկրների միության` ՕՊԵԿ-ի նավթի շուկայի գծով նոյեմբերի12-ին հրապարակված զեկույցում ասվում է, որ Ադրբեջանում 2015 թվականի հունվար-սեպտեմբեր ամիսներին նավթի արդյունահանման օրական ծավալն անցյալ տարվա նույն ժամանակաշրջանի համեմատ 30 հազար բարելով կրճատվել է:
Նավթի համաշխարհային գների և մանաթի փոխարժեքի անկման պատճառով Ադրբեջանի տնտեսությունը հայտնվել է ճգնաժամի մեջ. փակվել են նավթարդյունաբերության մի շարք ձեռնարկություններ, պետական և մասնավոր հաստատություներ, հազարավոր աշխատավորներ գործազուրկ են դարձել։
