«Նոր Հայաստան» հանրային փրկության ճակատի առաջնորդները շարունակելով քարոզչությունը հանրապետության մարզերում՝ նախօրեին հանդիպումներ անցկացրին Արագածոտնի մարզի Թալին, Աշտարակ քաղաքներում, Կոտայքի մարզի Հրազդան քաղաքում, Գեղարքունիքի մարզի Սևան քաղաքում, Տավուշի մարզկենտրոն Իջևանում և Դիլիջանում։
«Ժառանգություն» կուսակցության փոխնախագահ Արմեն Մարտիրոսյանը ցավով նշեց, որ ժողովրդի հետ իրենց զրույցները ցույց են տալիս, որ մարդիկ ոչ միայն իշխանության հետ հույս չեն կապում, այլև ընդդիմությունից են հիասթափված՝ չբացառելով նաև, որ հավաքների սակավամարդությունը պայմանավորված կարող է լինել մարզերի բնակիչների նկատմամբ իշխանության կողմից կազմակերպված ճնշումներով։
Արմեն Մարտիրոսյանը դժվարացավ ասել՝ «Նոր Հայաստան» հանրային փրկության ճակատին կհաջողվի՞ մարդկանց մոտ վերականգնել հավատը և դեկտեմբերի 1-ին ժողովրդի աջակցությամբ սկսել խոստացված իշխանափոխության գործընթացը։
Արագածոտնի և Տավուշի մարզերի բնակիչների շրջանում անցկացրած մեր հարցումները ցույց են տալիս, որ շարքային քաղաքացիներին սահմանադրական փոփոխությունները չեն հետաքրքրում։ Մարդիկ «այո»-ից ու «ոչ»-ից ավելի կարևոր են համարում գործազրկությունն ու սոցիալական օրախնդիր հարցերը։
«Նոր Հայաստան» հանրային փրկության ճակատի ներկայացուցիչների հերթական քարոզչական հանդիպումները տեղի կունենան այսօր՝ նոյեմբերի 17-ին, Մասիս, Արտաշատ, Գավառ և Մարտունի քաղաքներում:
