Գյումրիի նախկին քաղաքապետ Վարդան Ղուկասյանը որևէ կերպ ներգրավված չէ «Այո»-ի քարոզարշավում։ Նա մինչև վերջերս մեծ հույս ուներ, որ վերջին պահին իշխանությունները ճիշտ որոշում կկայացնեն և Գյումրիում «Այո»-ի շտաբի պատասխանատուի պարտականությունները կվստահեն իրեն։ Դրա համար Վարդան Ղուկասյանը մինչ քարոզարշավի սկսելը ջանք ու եռանդ չէր խնայում իշխանություններին մեսիջներ ուղարկել, հիշեցնել իր գոյության մասին։ Ղուկասյանն անգամ Բալասանյանին «փալաս» անվանեց՝ հայտարարելով, որ Գյումրիում նրան ոչ ոք չի վստահում, չի ճանաչում, ու նա չի կարող «Այո»-ի քարոզարշավ իրականացնել երկրորդ քաղաքում։
Իշխանությունները այդպես էլ վարվեցին. քաղաքապետ Սամվել Բալասանյանին մինչ օրս որևէ ձևով չեն ներգրավել «Այո»-ի շտաբի աշխատանքներում։ Այդ պարտավորությունը դրվել է մարզից ընտրված պատգամավորների վրա։ Ու թեև այսօր մամուլը գրել էր, որ Գյումրիում երկու տեղամաս էլ Վարդան Ղուկասյանին են տվել «Այո» ապահովելու համար, սակայն վերջինս այսօր մեզ հետ զրույցում հերքեց դա՝ չթաքցնելով իր նեղվածությունը իշխանություններից։
«Ախր ո՞վ է անում էդ տարածքների, տեղամասերի բաժանումը, որ մի հատ էլ տենց բան են գրում»,- հարցրեց Ղուկասյանը։ Իշխանությունը՝ պատասխանեցինք։ «Էհ, աղջիկ ջան, դու սխալվել ես, էդպես չի, ու հետո ասեմ ձեզ, որ էս երկրում շատ ավելի կարևոր հարցեր կան, ավելի կարևոր խնդիրներ կան, քան էդ Սահմանադրությունը։ Ամեն մարդ իր գործով է զբաղվում, իսկ ես այլևս քաղաքականությամբ չեմ զբաղվում, որ «Այո»-ի քարոզ իրականացնեմ»,- ասաց Ղուկասյանն ու անջատեց հեռախոսը։
Նշենք սակայն, որ վերջերս Ղուկասյանը մեզ հետ զրույցում ասել էր, որ եթե իշխանությունները «Այո»-ի քարոզը ճիշտ մարդու չվստահեն, անդառնալի հետևանքներ կարող են լինել՝ թերևս ակնարկելով հենց իր մասին։
ՀԳ. Նշենք, որ այսօր ԱԺ ՀՀԿ խմբակցության պատգամավոր Սուքիաս Ավետիսյանը մեր թղթակցի հետ զրույցում նշել էր, որ Գյումրու նախկին քաղաքապետ Վարդան Ղուկասյանը ներգրավվել է «Այո» շտաբում և նրա ուժերը սխալ է չօգտագործել:
