Ընթացիկ տարվա ընթացքում Գյումրի քաղաքում կատարված ճանապարհաշինական աշխատանքներն ամփոփ կերպով ներկայացրել է Գյումրիի քաղաքապետարանի բնակկոմունալ և շրջակա միջավայրի պահպանության բաժնի պետ Կնյազ Մանասյանը՝ այսօր քաղաքապետարանում հրավիրված խորհրդակցության ժամանակ, որին մասնակցում էին նաև Գյումրիում գործող լրագրողները: Ըստ ներկայացված թվերի՝ քաղաքի 250 փողոցից փոսային նորոգման է ենթարկվել 75-ը, իսկ 12 փողոց էլ հիմնանորոգվել է, ի շարս որոնց խճապատվել ու ճաքալցվել են ինչպես կենտրոնական, այնպես էլ մի շարք երկրորդական փողոցներ:
Սա վատ թիվ չէ, սակայն Սամվել Բալասանյանը նշեց, որ հատկապես անձրևներից հետո քաղաքի որոշ փողոցներում վիճակը, մեղմ ասած, վատ է, ինչը նախևառաջ պայմանավորված է քաղաքում նոր ջրագծերի անցկացմամբ զբաղվող ջրաշինական ընկերությունների թերի աշխատանքով, որոնք փոսերը փորում են ու թողնում այդպես բախտի քմահաճույքին: Խորհրդակցությանը մասնակցող ջրաշինական ընկերությունների ներկայացուցիչներից «Դորոժնիկ» ընկերության գլխավոր ինժեներ Գագիկ Կարապետյանը փորձեց հակադարձել, որ իրենց կատարած աշխատանքն այնքան էլ վատ չէ, քանի որ իրենք այս դեպքում ոչ թե պատվիրատու են, այլ պատվերն իրականացնող, և այս դեպքում պատասխանատուն պատվերն ընդունողը պետք է լինի, ոչ թե կատարողը:
«Մենք շեբենապատման մասով որոշակի պահուստային քանակություն ունենք ու կիրականացնենք շեբենապատում, չնայած որ մեր կողմից փորված փոսերն ու խրամուղիները գրեթե ամբողջովին փոսալցրել ենք ու շեբենապատել: Այնուամենայնիվ, եթե մարտին՝ հալոցքից հետո, խնդիրներ առաջանան կամ նախորդ տարիներից խնդիրներ առաջանան, մենք այդ քանակը կօգտագործենք ու շեբենապատում կիրականացնենք»,- նշեց պարոն Կարապետյանը:
Բալասանյանը հատկապես դժգոհ էր ջրաշինական մյուս՝ «Սադեհ արտեզյան» ընկերության իրականացրած աշխատանքներից, սակայն խորհրդակցությանը ներկա ընկերության ղեկավար Արշակ Դավթյանն էլ նշեց, որ իրենք խիճը ձեռք են բերել հենց Գյումրիից ու կարելի է ստուգել տեղում, որ իրենք օգտագործել են իրենց նախագծային ծավալից երկու անգամ ավելի խիճ:
«Մենք կանգ չենք առել ծախսերի առաջ և կատարել ենք ձեր պահանջները, սակայն թե ինչու է ձեր մոտ այսպիսի կարծիք առաջացել, չեմ կարողանում հասկանալ»,- նկատեց պարոն Դավթյանը:
Ի դեպ, խորհրդակցության ժամանակ քաղաքապետարանի բնակկոմունալ և շրջակա միջավայրի պահպանության բաժնի պետ Կնյազ Մանասյանը նշեց, որ իր ղեկավարած գերատեսչությունը պատրաստ է ձմռանը, ունեն և՛ անհրաժեշտ աղի պաշար, և՛ տեխնիկական միջոցներ:
Ինչ խոսք, անմխիթար վիճակում գտնվող փողոցների խնդիրը գյումրեցիներին ծանոթ է ոչ առաջին տարին ու ակամա հիշելով տարվա մեջ մի քանի անգամ ասֆալտապատվող մայրաքաղաքի կենտրոնական փողոցները՝ հարցադրում կատարել՝ ո՞ր բարոյական իրավունքով, երբ այդ ծախսումների մի մասով կարելի էր Գյումրիում ամբողջական թաղամասերի հարց լուծել: Մնում է միայն մտածել, որ մեր կենտրոնական իշխանությունների որոշ ներկայացուցիչների մոտ Գյումրիի զարգացումը միայն գեղեցիկ ճարտասանական հերթապահ տեքստերից են ու ճամարտակման ընտիր առիթներ և միայն այսքանը, իսկ իրականում գործում է ժողովրդի ասած՝ «Շանը կտամ, գիլանը կտամ, բայց քեզ մի թիքա էլ չեմ տա» հայտնի խոսքի տրամաբանությունը:
