«Առաջին լրատվական»-ի զրուցակիցն է ՀՀ պաշտպանության նախկին նախարար Վաղարշակ Հարությունյանը:
– ՌԴ նախագահ Վլադիմիր Պուտինը նախօրեին կարգադրել է Հայաստանի հետ ստորագրել համատեղ Հակաօդային պաշտպանության համակարգ ստեղծելու մասին համաձայնագիր և պաշտպանության ու արտաքին գործերի նախարարներին հանձնարարել է բանակցություն սկսել այդ հարցի շուրջ: Պարոն Հարությունյան, ինչպե՞ս կգնահատեք փաստը, որ Հայաստանն ու Ռուսաստանը, փաստորեն, հակաօդային պաշտպանության միացյալ համակարգ են ստեղծելու:
– Թեպետ նման համակարգ արդեն իսկ գործում է, սա Հայաստանի համար լավ լուր է: Սա ուղղված է միայն մեկ խնդրի՝ Հայաստանի օդային տարածքը պաշտպանելու համար է: Եթե Թուրքիան հարձակվի, այո՛, դա կլինի ուղղված իր դեմ, եթե մեկ այլ պետություն հարձակվի, ապա այդ պետության դեմ ուղղված կլինի: Հակաօդային պաշտպանական համակարգը պաշտպանում է Հայաստանի օդային տարածքը:
Մենք դեռ 1992 թվականից դիմել ենք Ռուսաստանին, քանի որ երբ Ռուսաստանի բանակը փլուզվեց Խորհրդային Միության հետ, և Ռուսաստանը որոշում ընդունեց, որ բանակը այստեղից պետք է հանի, մեր օդային տարածքը մնաց բաց: Մենք այդ ժամանակ չունեինք համապատասխան մասնագետներ, տեխնիկական սարքավորումներ, որպեսզի ապահովեինք հակաօդային պաշտպանությունը: Անձամբ ես 92թ. հանդիպել եմ Ռուսաստանի գենշտաբի հետ, դրանից հետո հանդիպել եմ ԱՊՀ երկրների միացյալ ուժերի գերագույն հրամանատարին և այդ հարցն առաջ եմ քաշել, որպեսզի մենք հակաօդային պաշտպանության համակարգը համատեղ օգտագործենք: Դրանից հետո ԱՊՀ շրջանակներում ձևավորվեցին միացյալ հակաօդային պաշտպանության ուժեր, դրանից հետո մենք հայ-ռուսական հարաբերություններում ձևավորեցինք և ստորագրեցինք փաստաթուղթ, որի համաձայն՝ մենք ձևավորեցինք միացյալ՝ ռուսական և հայկական հակաօդային պաշտպանության հրամկետ:
Դեռևս 1994թ. Ռուսաստանն այստեղ բերեց և տեղակայեց ինքնաթիռներ՝ ՄԻԳ-23, որից հետո մենք խորացրինք համագործակցությունը, 1998թ. այստեղ բերեցինք ժամանակակից ինքնաթիռներ՝ ՄԻԳ-29 և համակարգ S-300, որն առաջինն է տարածաշրջանում: Տարածաշրջանում որևէ մի պետություն չունի այդպիսի հզոր և կազմակերպված հակաօդային պաշտպանության համակարգ:
– Հաշվի առնելով, որ սա հայ-ռուսական համատեղ համակարգ է, ԼՂ օդային տարածքը որքանո՞վ է պաշտպանում:
– Դա այլ հարց է: Այս համակարգը ձևավորված է ապահովելու Հայաստանի հակաօդային պաշտպանությունը: Բայց պետք է մի բան հասկանանք, եթե ուժեղանում է Հայաստանի օդային տարածքը, ապա ուժեղանում է նաև ԼՂ օդային տարածքը: Որպեսզի ամեն ինչ հստակ հասկացվի, ուզում եմ մի բան շեշտել. ինքնաթիռ ոչնչացնելու և այդ համակարգն օգտագործելու որոշումն ընդունում է հայկական կողմը:
Ավելին՝ տեսանյութում
