Ժնևում խոշտանգումների հարցերով ՄԱԿ-ի կոմիտեում շարունակվում են Ադրբեջանում մարդու իրավունքներին առնչվող՝ հոկտեմբերի 11-ին սկսված՝ պաշտոնական Բաքվի համար ծանր լսումները:
«Թուրան» լրատվական գործակալությունը, հղում անելով միջազգային իրավապաշտպան կառույցների աղբյուրներին, հայտնում է, որ նստաշրջանում տարբեր պետությունների պատվիրակությունների անդամները մարդու իրավունքների պաշտպանության հետ կապված ոչ հաճելի հարցեր են ուղղում Ադրբեջանի ներկայացուցիչներին:
Նստաշրջանում պաշտոնական Բաքուն ներկայացնում են ԱԳՆ, ՆԳՆ, ԱԱՆ, արդարադատության, առողջապահության նախարարությունների, գլխավոր դատախազության, քրեակատարողական ծառայության, խորհրդարանի և այլ կառույցների բարձրաստիճան անձինք:
Նստաշրջանի մասնակիցները մասնավորապես հարցնում են REAL շարժման առաջնորդ Իլգար Մամեդովին ձերբակալված պահելու պատճառների մասին` հակառակ նրան անհապաղ ազատ արձակելու մասին ՄԻԵԴ որոշման, ձերբակալված իրավապաշտպաններ Լեյլա եւ Արիֆ Յունուսների վրա ճնշումների, նրանց նկատմամբ բռնությունների կիրառման կապակցությամբ դատաբժշկական փորձաքննության անցկացման ուշացման, Ադրբեջանի ԱԱՆ Նախիջևանի քրեակատարողական հիմնարկում Թուրաջ Զեյնալովի` խոշտանգումների հետևանքով մահվան մասին:
Որոշ մասնակիցներ ցնցվել են դատական գործընթացի ժամանակ ադրբեջանական NIDA շարժման ակտիվիստների նկատմամբ խոշտանգումների հրապարակման առնչությամբ, ինչպես նաևԲաքվի քրեակատարողական հաստատությունում Լեյլա Յունուսի պահման անտանելի պայմանների մասին լսելիս:
Մասնակիցները Ադրբեջանի ներկայացուցիչներին հարցեր են ուղղել մարդկանց առևտրում և սեռական շահագործման մեջ ոստիկանության մասնակցության, քաղաքացիական հասարակության ակտիվիստներին հետապնդելու, ՀԿ-ների ոլորտում օրենսդրության խստացման և այլնի մասին: Քննարկումների արդյունքներով տեղի կունենա մամուլի ասուլիս:
Ավելի վաղ միջազգային Human Rights Watch իրավապաշտպան կազմակերպությունը ՄԱԿ-ի խոշտանգումների հարցերով հանձնաժողովին կոչ էր արել դատապարտել Ադրբեջանի իշխանություններին, նրանցից պահանջել վերջ տալ բռնաճնշումներին և ազատ արձակել բոլոր քաղաքական բանտարկյալներին, որոնց թիվն այդ երկրում մոտ 100 է:
