Վենեսուելայում նախագահական ընտրությունների արդյունքները հրապարակելուց հետո տեղի ունեցած բախումների հետևանքով չորս մարդ է զոհվել։ Այս մասին հայտնում է պետական տեղեկատվական AVN գործակալությունը:
Տեղեկացվում է, որ երկու մարդ զոհվել են Միրանդա նահանգում, մեկը՝ Տաչիրայում, մյուսն էլ՝ Արևմտյան Զուլիայում:
Իշխող Միացյալ սոցիալիստական կուսակցության թեկնածու Նիկոլաս Մադուրոն այսօր պաշտոնապես երկրի նախագահ է հռչակվել: Ազգային ընտրական խորհուրդը երկուշաբթի օրը հաստատել է երկրի ղեկավարի կայացած ընտրությունների արդյունքները: ՄՍԿ-ի թեկնածուն փոքր առավելությամբ հաղթել է Դեմոկրատական միացյալ դաշինքի թեկնածու Էնրիկե Կապրիլեսին:
Ընդդիմության կողմնակիցները Վենեսուելայի մայրաքաղաքում բողոքի ակցիաներ են անցկացրել և պահանջել են, որ ընտրական խորհուրդը ձայների վերահաշվարկ կատարի: Երկուշաբթի երեկոյան կայացած երթի ժամանակ ցուցարարների և ոստիկանության միջև բախումներ են տեղի ունեցել, որի ժամանակ իրավապահները ստիպված են եղել արցունքաբեր գազ կիրառել:
Էնրիկե Կապրիլեսը կոչ է արել հետաձգել Մադուրոյին երկրի նախագահ հռչակելու արարողությունը մինչև ձայների վերահաշվարկ կատարելը: Նա զգուշացրել է, որ հակառակ դեպքում իր կողմնակիցները կշարունակեն բողոքի ակցիաները:
Ընդդիմության առաջնորդը հավաստիացրել է, որ իր կողմնակիցների բոլոր ակցիաները խաղաղ բնույթ կկրեն, և ինքը երկրում «խաղաղության և հանգստության» կողմնակից է:
