Ձյուդոյի՝ օլիմպիական վարկանիշային մրցաշարերի շարքին դասվող «African Open» ներկայացուցչական մրցաշարում հաջող է հանդես եկել Հայաստանը ներկայացնող Ժաննա Ստանկևիչը: Վերջինս 3 հաղթանակ տոնելով իպոնով՝ դարձավ 52 կգ քաշային կարգի հաղթող:
«Օլիմպիական խաղերին մասնակցելու մեր հիմնական հույսը Հովհաննես Դավթյանն է: Այս պահի դրությամբ, նա արդեն ունի համապատասխան միավորներ և վարկանիշային աղյուսակում է:
Հույսեր ենք կապում նաև Ժաննա Ստանկևիչի, ինչպես նաև 66 կգ քաշային կարգը ներկայացնող Ֆերդինանտ Կարապետյանի հետ, ով Գրան Պրիի ժամանակ զբաղեցրեց 7-րդ հորիզոնականը: Հաջորդ շաբաթ Կարապետյանը կմասնակցի չինական Գրան Պրիին:
Մենք Օլիմպիական 3 ուղեգրի հույս ունենք»,-ՀԱՕԿ պաշտոնական կայքը մեջբերում է Հայաստանի ձյուդոյի ֆեդերացիայի գլխավոր քարտուղար Դավիթ Խիթարյանը:
Հիշեցնենք, որ Ժաննա Ստանկևիչը ոսկե մեդալից բացի արժանացել է նաև վարկանիշային 100 միավորի, որը նրան թույլ կտա վարկանիշային աղյուսակում առաջադիմել 6 աստիճանով և բարձրանալ 33-րդ հորիզոնական:
ՀԱՕԿ մամլո ծառայություն
Լուսանկարը` Դավիթ Խիթարյանի ֆեյսբուքյան էջից
