Գերմանիայի խոշորագույն Lufthansa ավիաընկերությունը բորտուղեկցորդների գործադուլի պատճառով չեղարկել է 929 չվերթ։ Այս մասին հայտնել է ավիակոնցեռնի ներկայացուցիչը՝ փոխանցում է TASS գործակալությունը։
Գործադուլն անցկացվում է Մայնի Ֆրանկֆուրտի, Մյունխենի և Դյուսելդորֆի օդանավակայաններում։
Այն սկսվել է տեղի ժամանակով 04:30-ին և կավարտվի կեսգիշերին մոտ։ Ինչպես ասվում է, մոտ 113 հազար ուղևոր ստիպված կլինի վերանայել իր պլանները։
Բորտուղեկցորդների արհմիությունը գործնականում փորձարկում է իր նոր մարտավարությունը. այն նախապես չի տեղեկացնում բողոքի ակցիայի անցկացման ժամանակի մասին։ Lufthansa-ն գործադուլին պատրաստվելու շանս չի ունեցել։ Lufthansa-ի դուստր ընկերությունների բորտուղեցորդները գործադուլին չեն մասնակցում։
Գործադուլը հայտարարվել է այն բանից հետո, երբ կողմերը չեն կարողացել համաձայնության գալ սակագնային բանակցությունների հերթական ռաունդում։
Գործադուլը կանցկացվի երկրի տարբեր օդանավակայաններում ընդհատումներով՝ մինչև նոյեմբերի 13-ը։ Վեճն արհմիության և ավիաընկերության միջև շարունակվում է արդեն մոտ 2 տարի։
