Թուրքական Hürriyet թերթում հրապարակվել է թուրք անվանի լրագրող և վերլուծաբան Մեհմեդ Ալի Բիրանդի հոդվածը, որում անդրադարձ է կատարվում Հայոց ցեղասպանության միջազգային ճանաչմանն ու արաբական աշխարհի զարգացումներին.
«Մի ապրիլի 24 էլ անցավ պատմության գիրկը: ԱՄՆ նախագահ Բարաք Օբամայի շնորհիվ հաջողվեց խուսափել թուրք-ամերիկյան ճգնաժամից: Օբաման օգտագործեց նախորդ դեպքերում կիրառած մարտավարությունը և փորձեց իր խոսքերով բավարարել երկու կողմին էլ: Նա հայերի պահանջած «Ցեղասպանություն» եզրույթի փոխարեն գործածեց «Մեծ եղեռն» եզրույթը:
Սակայն ստացվեց այնպես, որ ո´չ հայերը, ո´չ էլ թուրքական իշխանությունները գոհ չմնացին Օբամայի ելույթից:
Ցեղասպանության վտանգը դեռ չի անցել, 2015 թվականից սկսած` Թուրքիան կրակն է ընկնելու: Դրանից խուսափելու համար մենք արդեն այսօրվանից պետք է հստակ ռազմավարություն մշակենք: Դրա համար մենք դեռ 4-5 տարի ունենք: Եթե դա տեղի չունենա, ապա մենք կարող ենք կանգնել մեծ խնդիրների առջև»:
Հիշեցնենք, որ հունվարի 11-ին էլ Բիրանդը գրել էր. «2010 թվականի դեկտեմբերին ԱՄՆ Կոնգրեսի Ներկայացուցիչների պալատի լիագումար նիստում Հայոց ցեղասպանության բանաձևի հետաձգմամբ մենք դժվարությամբ խուսափեցինք մեր դարպասում գոլ ընդունելուց:
Օբամայի վարչակազմի կողմից գործադրած ճնշման, ինչպես նաև Հրեական լոբբիի ակնկալվող աջակցության բացակայության պարագայում այդ գնդակը մեր դարպասից շեղությամբ անցավ: Այդ ժամանակ յուրաքանչյուրս ազատ շունչ քաշեցինք: Սակայն դա դեռ ոչինչ չի նշանակում:
Հնարավոր է, որ ապրիլին ի հայտ գա հերթական բանաձևը: Եթե դա էլ հաջողություն չունենա, ապա հաջորդ տարի դարձյալ կկրկնվի նույնը: Եվ այսպես կշարունակվի մինչև 2015 թվականը` Հայոց ցեղասպանության հարյուրամյա տարելիցը: Դա վերաբերում է նաև Թուրքիայի հանդեպ գործադրվող ճնշմանը:
Մենք պետք է կարևոր քայլ կատարենք, որպեսզի մինչև 2015 թվականը խուսափենք Ցեղասպանության հետ կապված՝ մեզ համար անսպասելի զարգացումներից: Միակ ելքը Հայաստանի հետ ստորագրված արձանագրությունների վավերացումն է: Դրանով իսկ կվերացվեն մեր հանդեպ կիրառվող ճնշումները:
Քանի դեռ չեն վերակենդանացվել հայ-թուրքական արձանագրությունները, մենք չենք պրծնի հայերի ձեռքից: Հակառակ դեպքում մինչև 2015 թվականը ամեն տարի մենք այսպիսի զարգացումներ կապրենք»:
