Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսի նախագահությամբ, Մայր Աթոռ Սուրբ Էջմիածնում նոյեմբերի 3-5-ը տեղի է ունեցել Գերագույն հոգևոր խորհրդի ժողով` ընդլայնված կազմով: Ինչպես տեղեկացրին Մայր Աթոռի տեղեկատվական համակարգից, ժողովի սկզբում Ամենայն Հայոց կաթո ղիկոսն իր օրհնությունն ու բարեմաղթանքներն է բերել ԳՀԽ անդամներին և հաջողություն մաղթել ժողովի աշխատանքներին: Նորին Սրբությունը նաև իր բարձր գնահատանքն է հայտնել ժողովականներին Հայոց եկեղեցուն մատուցած նվիրյալ ծառայության համար:
Ժողովն ատենապետել են Կ. Պոլսի Հայոց պատրիարքության պատրիարքական ընդհանուր փոխանորդ Գերաշնորհ Տ. Արամ արքեպիսկոպոս Աթեշյանը, ԱՄՆ Հայոց Արևմտյան թեմի առաջնորդ Գերաշնորհ Տ. Հովնան արքեպիսկոպոս Տերտերյանը և ԱՄՆ Հայոց Արևելյան թեմի առաջնորդ Գերաշնորհ Տ. Խաժակ արքեպիսկոպոս Պարսամյանը:
Ժողովին քննարկվել են Մայր Աթոռ Ս. Էջմիածին-Նվիրապետական Աթոռներ հարաբերությունները, թեմերի գործունեությունը, Հայ եկեղեցու միջեկեղեցական հարաբերություններին, ծիսական-կարգապահական կյանքին վերաբերող հարցեր:
Նոյեմբերի 3-ի նիստին Հայոց ցեղասպանության 100-րդ տարելիցի հիշատակի արարողություններին և միջոցառումներին Հայ եկեղեցու մասնակցության մասին զեկույց է ներկայացրել Մայր Աթոռ Սուրբ Էջմիածնի դիվանապետ Գերաշնորհ Տ. Արշակ եպիսկոպոս Խաչատրյանը: Գոհունակությամբ ընդունելով զեկույցը` ԳՀԽ անդամներն իրենց մասնավոր գնահատանքն են հայտնել Մեծ Եղեռնի 100-րդ տարելիցի արարողությունների կազմակերպիչ հանձնախմբին:
Գերագույն հոգևոր խորհրդի նիստին իրազեկվել է Մերձավոր Արևելքում տիրող իրավիճակի և սիրիահայ համայնքի խնդիրների մասին: Անդրադառնալով մինչ օրս Հայոց եկեղեցու Նվիրապետական Աթոռների և թեմական կառույցների կողմից սիրիահայությանը ցուցաբերված աջակցությանը` այդ թվում և նյութական` հաստատվել է, որ Մայր Աթոռ Ս. Էջմիածինը շարունակելու է իր զորակցությունը բերել ինչպես սիրիահայ համայնքին, այնպես և Հայաստանում ապաստան գտած սիրիահայ կարիքավոր ընտանիքներին:
Բելգիայում հայոց եկեղեցական համայնքների մասին զեկույցով հանդես է եկել Դիվանատան Ներեկեղեցական հարաբերությունների գրասենյակի տնօրեն Արժանապատիվ Տ. Պարույր քահանա Ավետիսյանը` ներկայացնելով բելգիահայ ծխական համայնքների կազմավորման առնչությամբ տրված հանձնարարականների գործընթացը և դրանց արդյունքները: Այս առնչությամբ հավելյալ տեղեկություններ է փոխանցել նաև Արևմտյան Եվրոպայի Հայրապետական պատվիրակ Գերաշնորհ Տ. Վահան եպիսկոպոս Հովհաննիսյանը:
Գերագույն հոգևոր խորհրդի ժողովին անդրադարձ է կատարվել նաև եկեղեցական ժողովական կառույցներին: Քննարկումների արդյունքում ծրագրվել է առաջիկա տարի Մայր Աթոռ Ս. Էջմիածնում գումարել Ազգային-եկեղեցական ժողով: Այս կապակցությամբ ստեղծվել են համապատասխան հանձնախմբեր:
Եպիսկոպոսաց ժողովի նորաստեղծ գրասենյակի գործունեության վերաբերյալ զեկույց է ներկայացրել գրասենյակի տնօրեն Հոգեշնորհ Տ. Զաքարիա վարդապետ Բաղումյանը: Գերագույն հոգևոր խորհրդի կողմից ուղենշվել են գրասենյակի ապագա գործունեության շրջանակները:
Նոյեմբերի 4-ի նիստի սկզբում Գերագույն հոգևոր խորհուրդը, նախագահությամբ Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսի, աղոթք է արել ՌԴ Տուլայի շրջանում Մոսկվայից Երևան ուղևորվող ավտոբուսի վթարի հետևանքով զոհված հայորդիների հոգիների հանգստության համար:
Ժողովի ավարտին Գերագույն հոգևոր խորհրդի անդամները շնորհավորել են Ամենայն Հայոց Հայրապետին գահակալության 16-րդ տարեդարձի առիթով` մաղթելով Նորին Սրբությանը կենաց արևշատություն և հովվապետական բեղուն գործունեություն` ի փառս Հայաստանյայց Առաքելական Ս. Եկեղեցու և ի մխիթարություն հավատավոր հայ ժողովրդի:
Ժողովը փակվել է Ամենայն Հայոց կաթողիկոսի «Պահպանիչ» աղոթքով:
