Այսօր Թբիլիսիում ՀՀ նախագահ Սերժ Սարգսյանը՝ կնոջ Ռիտա Սարգսյանի հետ ներկա են գտնվել հայկական Սուրբ Գևորգ առաջնորդանիստ եկեղեցու վերաօծման արարողությանը: Արարողությանը ներկա է եղել նաև Եկեղեցու բարերար, Վրաստանի նախկին վարչապետ Բիձինա Իվանիշվիլին, ով եկեղեցաշեն մյուս բարերարների հետ Վեհափառ Հայրապետի կողմից պարգևատրվել է Հայ Առաքելական Եկեղեցու բարձր պարգևներով:
Կայացել է եկեղեցու վերակառուցման ծրագրի բարերարների անուններով հուշատախտակի բացումը: Մինչ այդ, սակայն, տեղի է ունեցել բողոքի ակցիա: Մի խումբ վիրահայեր և ՀՀ քաղաքացիներ իրենց բողոքի ձայնն են բարձրացրել:
«Մենք այցով Վրաստանում ենք և իմանալով նախագահն է այստեղ՝ մեր բողոքն արտահայտեցինք այստեղ, և քանի որ սահմանադրական փոփոխությունների իրականացման համար հասարակական պահանջ չկա, որն արվում է հատուկ իշխանությունը պահելու և վերարտադրվելու համար, մենք մեր բողոքի ձայնը արտահայտեցինք նաև ազատ Վրաստանում, որի իրավունքն ունենք»,- ասաց քաղաքացիական ակտիվիստ Հարություն Աղամազյանը:
