Այսօր ԱՄՆ նախկին նախագահ Ջիմի Քարտերը եռօրյա այցով ժամանել է Հյուսիսային Կորեա: Այս մասին հաղորդում է Associated Press գործակալությունը: Նախատեսվում է, որ ԱՄՆ 39-րդ նախագահը հանդիպումներ կունենա երկրի ղեկավար Կիմ Չեն Իրի և նրա հավանական ժառանգորդ Կիմ Չոն Յինի հետ: Ըստ աղբյուրների` քննարկման հիմնական թեման լինելու է Հյուսիսային Կորեայում սննդամթերքի խիստ պակասը, ինչպես նաև Կորեայի միջուկային ծրագիրը:
Քարտերի հետ Կորեա են ժամանել Ֆինլանդիայի նախկին նախագահ Մարտի Ահտիսաարին, Նորվեգիայի նախկին վարչապետ Գրու Բրունթլանը և Իռլանդիայի նախկին նախագահ Մերի Ռոբինսոնը: Այս պատվիրակությունը Պհենյանից հետո կմեկնի Հարավային Կորեայի մայրաքաղաք` հանդիպելու տեղի իշխանությունների հետ: Սա Քարտերի առաջին այցելությունը չէ Հյուսիսային Կորեա:
Հիշեցնենք նաև, որ այս «խումբն» առաջին անգամ չէ, որ ներգարվվում է այս կամ այն տարածաշրջանում տարվող բանակցային գործընթացներում: Մի քանի ամիս առաջ այս պատվիրակությունը մեկնել էր Պաղեստին և Իսրայել` կողմերի միջև բանակցային գործընթացը վերականգնելու համար:
