Sputnik լրատվական գործակալության փոխանցմամբ՝ Վրաստանի պետական անվտանգության ծառայությունը Ուկրաինային խնդրել է համագործակցել ուկրաինական ԶԼՄ-ների այն հրապարակման հարցում, որն առնչվում է Վրաստանի նախկին նախագահ, Օդեսայի նահանգապետ Միխեիլ Սաակաշվիլու և վրացական «Ռուսթավի 2» հեռուստաընկերության գլխավոր տնօրենի միջև հեռախոսազրույցին, որում Սաակաշվիլին հայտարարել է անհրաժեշտության դեպքում խոսքի ազատությունը ֆիզիկապես պաշտպանելու մասին։
Վրաստանի պետական անվտանգության ծառայության ղեկավարի տեղակալ Լևան Իզորիան հայտարարել է, որ պետանվտանգության ծառայությունն արդեն իսկ դիմել է Ուկրաինայի համապատասխան գերատեսչություններին՝ համապատասխան տեղեկատվություն ստանալու նպատակով իրավական օգնության համար։
Նա հիշեցրել է, որ ԶԼՄ-ների հայտարարությունների ու հակահետախուզական աշխատանքների հիման վրա հարուցվել է քրեական գործ։ Հոկտեմբերի 24-ին հետաքննություն է սկսվել իշխանությանը տիրելու նպատակով դավ նյութելու գործով։ Իզորիան ընդգծել է, որ եթե հաստատվի տեսագրությունների իսկությունը, ապա կհարցաքննվեն հեռախոսազրույցի բոլոր մասնակիցները։
Թբիլիսիի քաղաքային դատարանը հոկտեմբերի 1-ին կալանք է դրել «Սաքարթվելո» հեռուստաընկերության գույքի վրա, որին պատկանումէ «Ռուսթավի 2»ի-ի բաժնետոմսերի 51 տոկոսը։
