Ինչպես այսօր գրում է բրիտանական The Guardian-ը, հղում կատարելով BM Savings ընկերության հետազոտությանը, փողը վերջին 50 տարվա ընթացքում կորցրել է իր արժեքի մոտ 94%-ը:
Ըստ հետազոտությունների` եթե արժույթները շարունակեն այս տեմպերով արժեզրկվել, ապա մեկ պինտա (մոտ կես լիտր) գարեջրի գինը կկազմի մոտ 8 ֆունտ ստերլինգ (մոտ 4,500 դրամ):
Օրինակները բերված են բրիտանական ֆունտ ստերլինգի համար, սակայն այս օրինաչափությունը պահպանվում է մյուս հիմնական արտարժույթների դեպքում նույնպես:
Թերթը գրում է, որ այսօրվա 1796 ֆունտ ստերլինգը գնողունակությամբ համարժեք է 1960թ.-ի 100 ֆունտ ստերլինգին: Ընդ որում` այս անկումը հստակ երևում է հիմնական ապրանքատեսակների գներից: Գարեջրի գինն աճել է 0.11 ֆունտից մինչև 2.94 ֆունտի, մեկ պինտա կաթն արժեր 0.03 ֆունտ, այժմ` 0.44:
Նույն BM Savings-ը կանխատեսում է, որ հաջորդ 50 տարիների ընթացքում փողը կարժեզրկվի ևս 63%-ով, ինչը նշանակում է, որ մեկ հացը, որը Մեծ Բրիտանիայում արժե 1.2 ֆունտ, 2060թ.-ին կարժենա 3.23 ֆունտ:
