Ադրբեջանական Salam News գործակալության փոխանցմամբ, ԱՄՆ Կոնգրեսի պատվիրակությունն ապրիլի 28-29-ը այցելելու է Ադրբեջան: Այս մասին հայտարարել է ադրբեջանական խորհրդարանի մամլո ծառայության պետ Ակիֆ Թավաքյուլօղլուն:
Վերջինիս խոսքերով, պատվիրակությունը գլխավորելու է Ներկայացուցիչների պալատի` Ադրբեջանի գծով աշխատանքային խմբի համանախագահ Բիլ Շուստերը: Պլանավորված է, որ իրենց ադրբեջանական այցի շրջանակներում կոնգրեսականները մի շարք հանդիպումներ են ունենալու ադրբեջանցի բարձրաստիճան պաշտոնյաների, այդ թվում` նաև խորհրդարանի առաջին փոխխոսնակ Զիյաֆաթ Ասկերովի հետ:
Հանդիպումների ժամանակ կողմերը քննարկելու են երկու երկրների միջխորհրդարանական հարաբերությունների, ինչպես նաև երկկողմանի համագործակցության հեռանկարների հարցեր:
Ներկայումս ճշգրտվում են ամերիկյան պատվիրակության կազմում ներառվելիք կոնգրեսականների տվյալները:
Հիշեցնենք, որ ներկայումս Ադրբեջանում է գտնվում Եվրոպայի ու Եվրասիայի հարցերով ԱՄՆ փոխպետքարտուղարի օգնական Թինա Քեյդենաուն, ով Ադրբեջանի նախագահ Իլհամ Ալիևի հետ քննարկել է ամերիկա-ադրբեջանական հարաբերությունների, ղարաբաղյան հակամարտության կարգավորման, տարծաշրջանային և այլ խնդիրներ:
