Թուրքական CNN TÜRK-ը, վկայակոչելով բրիտանական Daily Telegraph պարբերականը, նշում է, որ Անգլիայի թագուհի Էլիզաբեթ 2-րդը դեմ է արտահայտվել ԵՄ-ին Թուրքիայի անդամակցությանը:
Բուքինգհեմյան պալատում կազմակերպված միջոցառման ժամանակ Էլիզաբեթ 2-րդը նշել է. «ԵՄ-ն արդեն ունի 27 անդամ, և ամենևին կարիք չկա այդ թիվն ավելացնել ևս մեկով: Ես ցանկանում եմ, որ Թուրքիան երկար ժամանակ չանդամակցի ԵՄ-ին»:
Հիշեցնենք, որ Մեծ Բրիտանիայի վարչապետ Դևիդ Քեմերոնը մեծապես աջակցում է ԵՄ-ին Թուրքիայի լիիրավ անդամակցությանը: 2010 թվականի հուլիսի 27-ին Քեմերոնն Անկարայում հայտարարեց, թե ԵՄ-ին Թուրքիայի անդամակցելը կնպաստի մուսուլմանական աշխարհի հետ ԵՄ-ի հարաբերությունների բարելավմանը:
Բացի այդ, Քեմերոնը սուր քննադատության ենթարկեց այն երկրներին, որոնք ԵՄ-ին Թուրքիայի անդամակցելու հարցում գիտակցաբար իսլամատյացություն են առաջացնում: Ըստ Քեմերոնի` Թուրքիան չափավոր իսլամական երկիր է, և անհրաժեշտ է իսկական իսլամը տարբերել նրա ծայրահեղական տարբերակներից:
Քեմերոնը նաև ընդգծել էր Թուրքիայի դերը` որպես ՆԱՏՕ-ի անդամ. «Երբ ես պատկերացնում եմ, թե Թուրքիան` որպես ՆԱՏՕ-ի անդամ, որքան շատ բան է արել Եվրոպայի պաշտպանության համար, և այն, ինչ հիմա է անում Աֆղանստանում` մեր եվրոպական դաշնակիցների հետ, ապա զայրույթ եմ ապրում, որ ԵՄ-ին Թուրքիայի անդամակցության գործընթացը դանդաղեցվում է: Բավական չէ, որ ասում են՝ Թուրքիան միայն պահպանում է ճամբարը, նաև, որ պետք է գտնվի վրանում»:
Անկարայում Քեմերոնը հանձն առավ ստանձնել ԵՄ-ին Թուրքիայի անդամակցության գործընթացում «լավագույն փաստաբանի» դերը, ինչը նշանակում է, որ Մեծ Բրիտանիան ներկայումս փորձում է ԵՄ-ում Գերմանիայից ու Ֆրանսիայից խլել նախաձեռնությունն ու ազդեցությունը և, ի դեմս Թուրքիայի, հեռանկարում ստանալ հուսալի և բարյացակամ դաշնակցի:
Ուստի ամենևին էլ պատահական չէր, որ հոկտեմբերի 24-ին Թուրքիան և Մեծ Բրիտանիան Ստամբուլում հուշագիր ստորագրեցին ԵՄ-ին Թուրքիայի անդամակցության հարցում փոխըմբռնման ու համագործակցության շուրջ, իսկ Մեծ Բրիտանիայի Միջազգային հարաբերությունների թագավորական ինստիտուտը, որը հայտնի է Chatham House անունով, նոյեմբերի 9-ին տարվա քաղաքական գործչի մրցանակը հանձնեց Թուրքիայի նախագահ Աբդուլլահ Գյուլին:
